دوو وێنەی خۆپێشاندانەکەی دوو رۆژی رابردووی کەرکووک
رووداو دیجیتاڵ
وەزارەتی دەرەوەی ئەمریکا داوای چالاککردنەوەی مادەی 140ـی دەستووری هەمیشەیی عێراق دەکات بەمەبەستی نەهێشتنی هەر ناکۆکییەک کە پێکهاتەکان تایبەت بە کەرکووک هەیانە؛ ئاماژە بەوەش دەکات، واشنتن لەگەڵ هاوبەشەکانی لە بەغدا و هەولێر لەسەر هێڵە بۆ چارەسەرکردنی ناکۆکییەکانی تایبەت بە یاسای بودجەی عێراق.
رۆژی سێشەممە، 5-9-2023، ڤێدانت پاتێل، جێگری گوتەبێژی وەزارەتی دەرەوەی ئەمریکا لە کۆنفرانسێکی رۆژنامەڤانیدا لە واشنتن دی سی وەڵامی پرسیارەکانی تۆڕی میدیایی رووداوی دایەوە. لە وەڵامی پرسیارێکی تایبەت بە رەوشی کەرکووک، ڤێدانت پاتێڵ رایگەیاند، "بە وردی چاودێریی گرژییەکانی کەرکووک دەکەین؛ سەرکۆنەی ئەو تووندوتیژییە دەکەین کە روویدا. پرسە و سەرەخۆشی ئاراستەی خێزانی ئەو کەسانە دەکەین کە کوژران".
جێگری گوتەبێژی وەزارەتی دەرەوەی ئەمریکا ئاماژەی بەوەشکرد، واشنتن "داوا لە هەموو لایەنەکان دەکات لە رێگەی دیالۆگ و چالاککردنی مادەی 140ـی دەستووری عێراقەوە هەر ناکۆکییەک چارەسەر بکەن کە هەیە".
لە وەڵامی پرسیارێکی دیکەی پەیوەندیدار بە کێشەکانی تایبەت بە یاسای بودجەی عێراق و ئەو کێشە داراییەی کە بەهۆی نەناردنی پارەوە لە لایەن بەغداوە و هەناردەنەکردنەوەی نەوتی کوردستانەوە بۆ هەولێر دروستبووە، جێگری گوتەبێژی وەزارەتی دەرەوەی ئەمریکا گوتی، ئەوان بەردەوام لەگەڵ هاوبەشەکانیان لە بەغدا و هەولێر لەسەر هێڵن.
ئەم گوتەیەی پاتێل لە کاتێکدایە، رۆژی شەممە 2-9-2023 بەشێک لە هاونیشتمانیانی کەرکووک خۆپێشاندانیان کرد و دواتر گرژی دروستبوو و لە ئەنجامدا 4 هاونیشتمانی بە گولـلە گیانیان لەدەستدا و 16ـی دیکەش برینداربوون.
لە هەمان کاتدا نەناردنی مووچە لە لایەن بەغداوە بۆ مووچەخۆرانی هەرێمی کوردستان و کارئاسانینەکردنی بۆ هەناردەکردنەوەی نەوتی هەرێمی کوردستان، کێشەیەکی جیدی لە هەرێمی کوردستان دروستکردووە. مووچەخۆران لە عێراق مووچەی مانگی ئابیشیان وەرگرتووە، بەڵام مووچەخۆرانی هەرێمی کوردستان هێشتا مووچەی مانگی تەممووزیان وەرنەگرتووە.
ئەنجوومەنی وەزیرانی عێراق لە کۆبوونەوەی رۆژی یەکشەممە، 3-9-2023دا بڕیاریدا بڕی 500 ملیار دینار بۆ مووچەخۆرانی هەرێمی کوردستان بنێرێت، بەڵام حکومەتی هەرێمی کوردستان دەڵێت، ئەو پارەیە بەشی مووچە ناکات. پارەکە تاوەکو ئێستاش نەنێردراوە.
دەقی پرسیار و وەڵامی رووداو لەگەڵ ڤێدانت پاتێل:
رووداو: سوپاس ڤێدانت، دوو پرسیار لەبارەی عێراق، یەکەمیان، کۆمێنتی ئێوە لەسەر رووداوەکانی ئەم دوایەی کەرکووک چییە، کە ناوچەیەکی جێناکۆکە لە عێراق؟ لەوێ خۆپیشاندانی کورد و عەرەبیش هەبوو، چوار خۆپیشاندەر کوژران، ژمارەیەکیش برینداربوون و دەستگیرکران، کۆمێنتی ئێوە لەسەر ئەمە چییە، هەروەها ئەمریکا چۆن دەڕوانێتە گرژییەکانی نێوان کورد و عەرەب لە کەرکووک؟
ڤێدانت پاتێل: ئێمە بە وردی چاودێریی گرژییەکانی کەرکووک دەکەین؛ سەرکۆنەی ئەو تووندوتیژییە دەکەین کە روویدا. پرسە و سەرەخۆشی ئاراستەی خێزانی ئەو کەسانە دەکەین کە کوژران. ویلایەتە یەکگرتووەکان داوا لە هەموو لایەنەکان دەکات لە رێگەی دیالۆگ و چالاککردنی مادەی 140ی دەستووری عێراقەوە هەر ناکۆکییەک چارەسەر بکەن کە هەیە.
رووداو: پرسیارێکی دیکە لەبارەی ناکۆکییەکانی نێوان هەولێر و بەغدا لەسەر پرسی بودجە و هاوبەشیپێکردنی داهات، هێشتا بەغدا رەتی دەکاتەوە پشکی هەرەمی کوردستان بنێرێت، بەرپرسانی هەرێمی کوردستانیش بەغدا بەوە تۆمەتبار دەکەن کە ئەوان بەمەبەست قەیرانی دارایی هەرێمی کوردستان گەورەتر دەکەن، بۆ بەدەستهێنانی هەندێک دەسکەوتی ستراتیجی زیاتر؟ ئێوە هیچ گفتوگۆیەکتان لەسەر ئەم پرسە لەگەڵیاندا هەیە؟
ڤێدانت پاتێل: ئێمە بەدڵنیاییەوە بەردەوام لەسەر هێڵین لەگەڵ هاوبەشەکانمان لە بەغدا و هەولێر؛ هەروەها رێگە بە نوێنەرانمان لە هەردوو شار دەدەین بۆ ئەوەی لەبارەی ئەو پەیوەندییە قسە بکەن بۆ پێدانی زانیاری زیاتر.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ