ژووری بازرگانیی سلێمانی: زۆریی باج و نەبوونی پارە هۆکارن بۆ داخستنی نووسینگەکانی خانووبەرە

 

 

کەریم حەسەن، خاوەن نووسینگەی خانووبەرە بە رووداوی گوت، "زۆریی زەریبە وای لێکردووین کە نووسینگەکانمان دابخەین، چونکە بازاڕ نییە و باج زۆرە، پێشتر 210 هەزار دینارم دەدا، ئێستا ئەم ساڵ چووم 800 هەزارم داوە، ئەمەش جگە لە ژووری بازرگانی و رسوماتەکانی دیکە."

 

هەرچەندە ژمارەی نووسینگەکانی خانووبەرە لە هەڵەبجە زیادیان کردووە، بەڵام نرخی موڵک و خانوو بەراورد بە چەند ساڵی رابردوو دابەزیون، بە شێوەیەک لە هەندێک شوێنی ئەو پارێزگایە زیاتر لە 35 هەزار دۆلار نرخ کەمیکردووە.

 

وەرزێر عەبدولڕەحمان، خاوەنی نووسینگەی خانووبەرە باس لەوە دەکات، نەبوونی خزمەتگوزاری و نەبوونی پارە و داهات و مووچە، وایان کردووە نرخی موڵکەکان کەم ببنەوە، "ئێستا نرخ کەم بووەتەوە و نووسینگە زیادی کردووە."

 

بەپێی ئامارەکانی ژووری بازرگانی و پیشەسازی لە سلێمانی، زیاتر لە سێ هەزار نووسینگە تۆمار کراون، لە ساڵێکدا 600یان داخراون. کورتهێنانی داهات هۆکارێکی دیکەیە بۆ کەم بوونەوەی خواست لەسەر کڕین یان بەکرێدانی خانوو و زەوی، ئەویش وایکردووە کە خاوەن نووسینگەکان دووچار بە داخستنی شوێنی کارەکانیان ببنەوە.

 

سەلام عەبدوڵڵا، بەڕێوەبەری ژووری بازرگانیی سلێمانی دەڵێت، "زۆریی باج و نەبوونی پارە بۆ کڕینی زەوی و خانوو وایان کردووە کە نووسینگەکان دابخرێن."

 

لە ساڵی 2017 تاوەکو 2021 بازاڕی کڕین و فرۆشتنی یەکەکانی نیشتەجێبوون، بەتایبەت پرۆژەکانی وەبەرهێنان، گەرم بوون، بەڵام بە گوتەی نووسینگە و کۆمپانیاکانی خانووبەرە، کورتهێنان لە داهات و دواکەوتنی مووچە وایان کردووە ئەمساڵ کڕین و فرۆشتن کەم ببێتەوە.