رووداو دیجیتاڵ
بەگوێرەی زانیارییەکانی رووداو، بۆ تەواوکردنی رێکارەکانی بەڕێوەچوونی هەڵبژاردنی پەرلەمانی کوردستان، سبەی شاندێک لە کۆمیسیۆنی باڵای هەڵبژاردنەکانی عێراقەوە سەردانی هەولێر دەکات.
ئەمڕۆ دووشەممە 05-08-2024 بەرپرسێکی باڵای کۆمیسیۆن بە تۆڕی میدیایی رووداوی گوت، "تەواوی رێکارەکان لە لقەکانی کۆمیسیۆن تەواو کراون و ناوەکان لە بەغدان بۆ ناردنیان بۆ وەزارەتی ناوخۆ و دەستەی دەستپاکیی هەرێمی کوردستان."
بەگوێرەی زانیارییەکانی رووداو، تاوەکو کاژێر 11:00ی ئەمڕۆ ناوی بەربژێرەکانی پەرلەمانی کوردستان نەگەیشتوونەتە دەستەی دەستپاکیی هەرێمی کوردستان.
بەرپرسەکەی کۆمیسیۆن گوتی، رۆژی دووشەممەی داهاتوو تیروپشک بۆ پێدانی ژمارە بە بەربژێران، لیست و هاوپەیمانییەکان دەکرێت.
حاکم ئەحمەد ئەنوەر، سەرۆکی دەستەی دەستپاکیی هەرێمی کوردستان دووشەممەی رابردوو بە رووداوی گوت، لەگەڵ گەیشتنی لیستەکان، بە نزیکەی 4 رۆژ سەرجەم کارەکان تەواو دەکەن.
بەگوێرەی سیستمی تۆمارکردن و پەسندکردنی لیستی بەربژێرانی هەڵبژاردنی ساڵی 2024ـی پەرلەمانی کوردستان، مەرجە ئەو کەسەی دەبێتە بەربژێر بۆ هەڵبژاردنی خولی شەشەم ئەم شەش مەرجەی تێدا بێت:
- هاووڵاتی هەرێمی کوردستان بێت (بەپێی ناسنامەی باری شارستانی یان کارتی نیشتمانی یان کارتی بایۆمەتریی دەنگدان) و نیشتەجێی ئەو شوێنە بێت کە کارتی زانیارییەکەی تێدا دەرچووە.
- تەواو شیاو بێت و 25 ساڵ کەمتر نەبێت.
- بتوانێت بخوێنێتەوە و بنووسێت.
- بە تاوانەکانی ئابڕووبەری ئەخلاقی، ئادابی گشتی و دەستپاکی سزای زیندانیکردنی نەبێت.
- بە تاوانەکانی کوشتنی بەئەنقەست یان دزیکردن سزای زیندانیکردنی نەبێت.
- لەو تاوانانەی دەسەڵاتە سەرکوتکارەکان پلانیان بۆ داڕشتووە بەشداری نەکردبێت یان لە هەرێمی کوردستان ئەو تاوانەی نەکردبێت.
کۆمیسیۆن لیستی ناوی بەربژێران بۆ هەریەک لە وەزارەتەکانی ناوخۆ لە عێراق و هەرێمی کوردستان و دەستەکانی دەستپاکی لەو دوو حکومەتە دەنێرێت و پێویستە لە 15 رۆژدا وردبینی و لێکۆڵینەوە لە ناوەکان و شیاوێتیی بەربژێران تەواو بێت.
1198 بەربژێر وەک سەربەخۆ، بەربژێری کۆتای پێکهاتە، لیستی پارت و هاپەیمانێتییەکان ناوی خۆیان تۆمارکردووە بۆ هەڵبژاردنی خولی شەشەمی پەرلەمانی کوردستان کە بڕیارە لە 20ی تشرینی یەکەمی ئەم ساڵدا بکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ