رووداو دیجیتاڵ
بەڕێوەبەری گشتیی هۆبەی رووبەڕووبوونەوەی قەیرانی پارێزگای کرماشان دەڵێت: "لە ئەنجامی بارینی بەردەوامی باران لە بەشێک لە ناوچەکانی پارێزگاکە، لافاو دروستبوو و ئەوەش زیانی بە بەشێک لە کێڵگەکان لە ژمارەیەک گوندی پارێزگاکە گەیاند".
ئەمڕۆ شەممە، 5ی نیسانی 2025، عەلی رەزا حەیدەری، بەڕێوەبەری گشتیی هۆبەی رووبەڕووبوونەوەی قەیرانی پارێزگای کرماشان رایگەیاند: "لە ئەنجامی بارانبارینی زۆر لە پارێزگاکە، لافاو دروستبوو، ئەوەش لە چەند گوندێکی ناوچەی هەرسین زیانی بە کەرتی کشتوکاڵ و رێگاوبان گەیاند، بەتایبەتی لە سنووری گوندەکانی دێهنۆ، چێشمە کەبوود و کەلکەشوەند".
عەلی رەزا حەیدەری گوتیشی: "تاوەکو ئێستا قەبارەی زیانەکە نەزانراوە و بە بڕیاری پارێزگاری کرماشان، قایمقامی هەرسین راسپێردراوە بۆ ئەوەی بەدواداچوون بۆ زیانەکان بکات".
عەلی رەزا حەیدەری ئاماژەی بەوەشکرد:"بارانبارین و لافاوەکە هیچ زیانێکی گیانی لێنەکەوتووەتەوە".
لە 2ی نیسانەوە شەپۆلێکی بارانبارین پارێزگاکانی رۆژهەڵاتی کوردستانی گرتووەتەوە و لە بەشێک لە ناوچەکانی پارێزگاکانی ئیلام و کرماشان و لوڕستان لافاو دروستبووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ