رووداو دیجیتاڵ
جێگری بەڕێوەبەری پۆلیسی پارێزگای سنە دەڵێت، لە کامیارانی سەر بە پارێزگاکە، دەستیان بەسەر بڕێکی زۆر حەبی هۆشبەردا گرتووە. پەیوەست بە دۆسیەکەش دوو کەس دەستگیر کراون.
رۆژی پێنجشەممە 02-01-2025، لوتفوڵڵا دارابی، جێگری بەڕێوەبەری پۆلیسی پارێزگای سنەی رۆژهەڵاتی کوردستان رایگەیاند، لە چوارچێوەی بەرەنگاربوونەوە و نەهێشتنی مادە هۆشبەرەکان، تیمەکانیان لە ماڵێکدا لە شاری کامیارانی سەر بە پارێزگاکە، دەستیان بەسەر 43 هەزار و 534 حەبی هۆشبەردا گرتووە.
لوتفوڵڵا دارابی گوتی، جگە لە حەبە هۆشبەرەکان، لە ماڵەکەدا دەست بەسەر هەندێک کەلوپەلی میکیاژ و جوانکاریی ئافرەتاندا گیراوە کە تەندروست نەبوون، هەروەها 36 کیلۆگرام پاودەری قەڵەوییش کە قاچاخ بووە، دۆزراوەتەوە.
بەگوتەی جێگری بەڕێوەبەری پۆلیسی سنە، پەیوەست بە دۆسیەکە دوو کەس دەستگیر کراون و دوای کردنەوەی پەڕاوی لێکۆڵینەوە، رادەستی دەسەڵاتی دادی پارێزگاکە کران.
بەپێی ئاماری فەرمیی کە ساڵی 2020 ناوەندی بەرەنگاربوونەوەی مادەی هۆشبەری ئێران بڵاوی کردووەتەوە، دوو ملیۆن و 800 هەزار ئالوودەبووی مادەی هۆشبەر لەم وڵاتەدا هەن، هەروەها پێشبینی دەکرێت یەک ملیۆن و 400 هەزار ئالوودەبووی دیکەش هەبن، کە تاوەکو ئێستا دەستنیشان نەکراون.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ