کوردستان
بەڕێوەبەری بەرگریی شارستانیی سۆران: چەندەی هەوا تاریکتر بێت، سەختیی هێنانەخوارەوەی تەرمەکەش زیاترە
prev
next
رووداو دیجیتاڵ
هاونیشتمانییەک لە چیای زۆزک، لە بەرزایی زیاتر لە هەزار و 500 مەتر هەڵدێرا و گیانی لەدەستدا. بەڕێوەبەری بەرگریی شارستانیی سۆران دەڵێت، ''شوێنی هەڵدێرانەکەی سەخەتە و 7 تیممان سەرقاڵی هێنانەخوارەوەی تەرمی هاونیشتمانییەکەن.''
ئەمڕۆ (پێنجشەممە، 02-01-2025) تیمەکانی بەرگریی شارستانیی سۆران ئاگادارکراونەتەوە کە هاونیشتمانییەک لە چیای زۆزک، لە بەرزایی زیاتر لە هەزار و 500 مەتر هەڵدێراوە و گومان دەکرێت گیانی لەدەستدابێت.
کاروان میراودەلی، بەڕێوەبەری بەرگریی شارستانیی سۆران قسەی بۆ ئەندام جەبار، پەیامنێری تۆڕی میدیایی رووداو کرد و رایگەیاند، ''هەوڵی خۆمان دا بۆ رزگارکردنی ئەم هاونیشتمانییە، بەڵام بەداخەوە سەرەڕای گەیشتنی تیمەکانمان و فریاگوزاریی سەرەتایی، گیانی لەدەستدا.''
کاروان میراودەلی گوتیشی، ''ئێستا، پێنج تیممان سەرقاڵی هێنانەخوارەوەی تەرمەکەن، دوو تیمی دیکەش خەریکە بۆ هاوکاریکردنیان دەچن.''
بەڕێوەبەری بەرگریی شارستانیی سۆران ئاماژەی بەوە کرد، چەندەی هەوا تاریکتر بێت، سەختیی هێنانەخوارەوەی تەرمەکەش زیاترە، ''رێگەکە هەمووی گەلییە و شوێنی هەڵدێرانی زۆرە، بەڵام خەڵکی گوندەکانمان لەگەڵدایە کە شارەزای چیاکەن و هاوکاریمان دەکەن.''
بەگوتەی کاروان میراودەلی، شوێنی هەڵدێرانی هاونیشتمانییەکە زۆر سەختە و داوای فڕۆکەیان بۆ هێنانەخوارەوەی تەرمەکەی کردووە، ''بەڵام تیمی فڕۆکەوانی بەهۆی تاریکیی هەوا و سەختیی شوێنەکە، نەیانتوانی هاوکاریمان بکەن.''
بەپێی زانیارییەکان هانیشتمانییەکە خەڵکی سۆرانە. وەک بەڕێوەبەری بەرگریی شارستانیی سۆران دەڵێت، ''بەهۆی سەختیی شوێنی هەڵدێرانەکەی، هێنانەخوارەوەی تەرمی ئەو هاونیشتمانییە نزیکەی دوو کاژێر و نیو بۆ سێ کاژێر دەخایێنێت.''
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ