دیمەنی نێو ماڵە سووتاوەکەی هەولێر.
رووداو دیجیتاڵ
لە گەڕەکی باداوەی هەولێر، بەهۆی شۆرتی کارەباوە ئاگر لە ماڵێک کەوتەوە. خاوەن ماڵەکە دەڵێت، ''زۆپای کارەبایی ئاگری گرتووە و بەشێک لە کەلوپەلی ناوماڵەکەمان سووتاوە.''
کاژێر 06:00ـی بەیانیی ئەمڕۆ (سێشەممە 02-01-2024)، لە گەڕەکی باداوەی هەولێر، بەهۆی شۆرتی کارەباوە ئاگر لە ماڵێک کەوتەوە کە بەهۆیەوە بەشێک لە کەلوپەلی ناوماڵەکە سووتا.
بەگوتەی فەرهاد دۆڵەمەڕی، پەیامنێری تۆڕی میدیایی رووداو، خاوەنی ماڵەکە لە دەرەوە بووە و کاتێک گەڕاوەتەوە، زانیوێتی کە شۆرتی کارەبایی روویداوە و بەهۆیەوە بەشێک لە وایەر و زۆپایەکی کارەبایی ئاگریان گرتووە.
سوارە محەممەد، خاوەن ماڵەکە بە رووداوی گوت، ''لە ماڵی باوکم بووین، شەو جارێک هاتینەوە، بینیمان زۆپای کارەباییەکەمان بەسەر راخەری ژوورەکەدا کەوتووە و ئاگری گرتووە، خێرا ئاگرەکەمان کووژاندەوە و دواتر بەهۆی دووکەڵێکی زۆر کە لە ناو ماڵ هەبوو، دووبارە گەڕاینەوە ماڵی باوکم.''
سوارە محەممەد گوتیشی، ''هەستمان پێ نەکردبوو زۆپاکە بەسەر وایەری کارەبادا کەوتووە کە لەژێر راخەرەکەدا بوو و شۆرتی کردووە. بەیانی کە هاتمەوە بچمە سەرکار، بینیم دووبارە ئاگر کەوتووەتەوە و بەشێکی زۆر لە کەلوپەلی ناوماڵ سووتاون.
سوارە دەڵێت، هاوژینەکەی کاری بەرگدووری دەکات و زیاتر لە 30 قوماشی خەڵک و مەکینەی بەرگدوورییەکەی کە هێشتا قیستەکانی تەواو نەبوون، بەهۆی ئاگرکەوتنەوەکەوە لەنێوچوون، گوتیشی، خۆی پێشمەرگەیە و کرێکاریش دەکات.
وەک پەیامنێری رووداو گوتی، ئاگرکەوتنەوەکە زیانی گیانی نەبووە، بەڵام بەهۆیەوە بەشێکی زۆر لە کەلوپەلی ناوماڵی هانیشتمانییەکە لەنێوچوون و سووتاون.
بەگوێرەی ئاماری بەرگریی شارستانی هەولێر بۆ تۆڕی میدیایی رووداو، لە 11 مانگی ساڵی 2023دا لە شاری هەولێر و دەوروبەری و قەزاکانی کۆیە و شەقڵاوە، هەزار و 961 رووداوی ئاگرکەوتنەوە تۆمارکراون. بەگوێرەی پۆلیسی هەرێمی کوردستان، ساڵی 2022 حەوت هەزار و 546 رووداوی ئاگرکەوتنەوە لە هەرێمی کوردستان روویانداوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ