رووداو - تەندروستی
سەرەتای ساڵی نوێ کاتێکی زۆر باشە بۆ گۆڕینی شێوازی ژیانی تەندروست و وازهێنان لە خووە خراپەکان بۆ دەروون و تەندروستی، ئەمانەی خوارەوەش باوترین خووە تەندروستەکانن کە پێویستە هەمیشە و بەتایبەتیش لەگەڵ دەستپێکی ساڵی نوێ بکرێن.
1- دابەزاندنی کێش؛ بە گوێرەی کۆمەڵەی فیسیۆلۆژیی جەستەی ئەورووپی، بە دابەزاندنی 5٪ـی کێشی جەستە ئەگەری تووشبوون بە نەخۆشییە درێژخایەنەکان 50٪ کەمدەبێتەوە. نەخۆشییەکانیش وەکو {شەکرە، بەرزەپەستانی خوێن و شێرپەنجە}. هەر بۆیە دەکرێت بە رێژیم یاخود وەرزش لەژێر سەرپەرشتی کەسێکی پسپۆڕ ئەو ئامانجە بپێکیت.
2- رێکخستنی خۆراک و پارێزی؛ خۆراکی تەندروست دەکەوێتە سەر ئەوەی کە چی دەخۆیت و بە چ بڕێکیش دەیخۆیت؟ بۆیە پسپۆڕان و کۆمەڵەکانی خۆراک پێشنیازدەکەن، هەمەجۆری لە خۆراکدا هەبێت و بڕێکی باشیش لە سەوزە و میوەکان بخورێن.
3- کەمدانیشتن و جووڵەی بەردەوام؛ دەکرێت بە جووڵە و چالاکیی جەستەیی بەردەوام لەشێکی رێکت هەبێت و کەمتر پێویستیت بە هۆڵەکانی لەشجوانی بێت، رێکخراوی تەندروستیی جیهانی دەڵێت: ''رۆژانە لانیکەم 30 خولەک بەپێ رۆیشتن یاخود زیاتر لە پێنج هەزار هەنگاوی رۆژانە هەبێت''.
4- بایەخدان بە پشکنینی پێشوەختە؛ بۆ دڵنیابوونەوە لە تەندروستی و دەرووندروستی بەپێی بایەخدان و پێویستی، پشکنینی پێشوەختەی نەخۆشییە درێژخایەنەکانی وەکو بەرزەپەستانی خوێن و شەکرە بکرێن و بایەخیش بە هەریەک لە پشکنینەکانی پڕۆستات لە پیاوان و مەمک لە خانمان بدرێت. {لێرەوە بابەتێک ببینە}.
5- ئاسوودەیی دەروون و کەمکردنەوەی گوشاری دەروونی؛ بۆ پاراستنی دەرووندروستی گرنگە هەمیشە بایەخ بە وەرزش و چالاکییەکانی کۆنتڕۆڵکردنی دڵەڕاوکێ و گوشاری دەروونی بدرێت، کۆمەڵەی دەرووندروستی لە بەریتانیا رایدەگەیێنێت، ئەنجامدانی رۆژانەی راهێنانەکانی هێوربوونەوە پێویستن وەکو {یۆگا، خۆخاوکردنەوە و گوێگرتن لە میوزیک}.
6- خەوی رێک؛ هەمیشە لە توێژینەوە و سەرچاوە پزیشکییەکاندا خەو بە فاکتەرێکی سەرەکی بۆ تەندروستبوونی ئەندامەکانی دیکە و دەروونیش دانراوە، کۆمەڵەی خەو لە ئەمریکا دەڵێت: سنوورداکردنی شاشەکان، دابینکردنی ژینگەیەکی بێدەنگ بۆ خەوتن و بوونی کاژێری تەواو لە خەوتن بۆ بە ئامانجکردنی ئەم خووە هەبن.
7- دانانی پلان بۆ وازهێنان لە جگەرە و نێرگەلە؛ ناوەندی کۆنتڕۆڵ و پێشگیریکردن لە نەخۆشییەکان لە ئەمریکا ئاشکرای کردووە، جگەرەکێشان بە نزیکەیی زیان بە هەموو ئەندامەکانی جەستە دەگەیێنێت و هۆکارێکی سەرەکیی مردنە. هاوکات ئەگەری تووشبوون بە شێرپەنجەکانیش زیاددەکات. بۆیە پێویستە بە پلان واز لە کێشانی جگەرە و نێرگەلە بهێندرێت. {دوای وازهێنان لە جگەرە و نێرگەلە، چی بەسەر جەستەدا دێت؟}.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ