ئارێز خالید - دکتۆر ئاری سەڵاحەدین.
رووداو - تەندروستی
بەڕێوەبەری ڤێتێرنەریی سلێمانی رایدەگەیێنێت، بە نزیکبوونەوە لە جەژنی قوربان، سەربڕینی نایاسایی زۆر دەبێت و زیاتریش تای خوێنبەربوون بڵاودەبێتەوە.
ئەمڕۆ یەکشەممە دکتۆر ئاری سەڵاحەدین، بەڕێوەبەری ڤێتێرنەریی سلێمانی لە بووڵتەنی کاژێر 10:00دا بە رووداوی راگەیاند، خاوەن ئاژەڵەکان دەرمانی لەنێوبردنی مشەخۆر و گەنەکان بەکاربهێنن، بۆ ئەوەی ئامادەکاری بکەن بۆ جەژنی قوربان.
دکتۆر ئاری سەڵاحەدین دەڵێت: مەرج نییە هەموو گۆشتێک ببێتەهۆی نەخۆشیی تای خوێنبەربوون، بەڵکو تەنیا لەو گۆشتانەیە کە ئاژەڵەکە لە سەربڕخانە نایاساییەکان سەربڕدرابن و مۆری ڤێتێرنەرییان پێوە نەبێت.
ئەوەشی باسکرد کە هەر ئاژەڵێک مۆری فەرمیی کوشتارگەی پێوە بێت، گۆشتەکەی تەندروستە و سەلامەتە.
ئاماژە بەوەشدەکات، لەم وەرزەدا کەشوهەوا گەرمە و ئەمەش زیاتر گەنەکان چالاک دەکات، کە دەشێت هۆکار بێت بۆ زیاتر بوونی حاڵەتەکانی تای خوێنبەربوون.
تای خوێنبەربوون چۆن دەگوازرێتەوە؟
تای خوێنبەربوون بە چەندین رێگە دەگوازرێتەوە بۆ مرۆڤ و دەکرێت مرۆڤ بە سووکی تووشی بێت و لە زۆر باریشدا دەیکوژێت، رێکخراوی تەندروستیی جیهانی دەڵێت: رێژەی مردن لەنێو تووشبووان 10٪ بۆ 40٪ـە. ڤایرۆسەکە لە رێگەی ئاژەڵ و مێشوولەوە دەگوازرێتەوە بۆ مرۆڤ کە رێگەکانی گواستنەوە بریتین لە:
لەکاتی پێوەدانی مێشوولەیەکی هەڵگری ڤایرۆسەکە
لەکاتی کوشتنی مێشوولەیەکی هەڵگری ڤایرۆسەکە
لەکاتی سەربڕینی ئاژەڵێکی هەڵگری ڤایرۆسەکە
لەکاتی بەرکەوتن بە ئاژەڵێکی هەڵگری ڤایرۆسەکە
خواردنی گۆشتی ئاژەڵێکی هەڵگری ڤایرۆسەکە
بەریەککەوتن لەگەڵ کەسێکی تووشبوو
بەریەککەوتن لەگەڵ جرج و مشک
بۆچی تای خوێنبەربوون مەترسیدارە؟
تای خوێنبەربوون زیان بە موولوولەکانی خوێن دەگەیێنێت و دووچاری خوێنبەربوونیان دەکات، هەر ڤایرۆسەکە ئاستەنگ لەبەردەم خوێن مەیاندن دروستدەکات، لەئەنجامدا خوێنبەربوونی نێوەکی لێدەکەوێتەوە و مەترسیی لەسەر ژیانی کەسی تووشبوو دروستدەکات.
نیشانەکانی تووشبوون بە تای خوێنبەربوون:
تا
شەکەتی و هەستکردن بە بێهێزی
سەرسووڕان
ئازاری ماسوولکە، ئێسک یاخود جومگەکان
هێڵنج و رشانەوە
سکچوون
ئەو نیشانانەی کە مەترسی لەسەر ژیان دروستدەکەن:
خوێنبەربوونی ژێر پێست یاخود ئۆرگانە ناوخۆییەکان یاخود لە دەم، گوێ و چاو.
لەکارکەوتنی سیستەمی دەمار
کۆما
سستبوونی گورچیلە
ناکارابوونی کۆئەندامی هەناسەدان
ناکارابوونی جگەر
چۆن خۆمان لە تای خوێنبەربوون بپارێزین؟
رێگریکردن لە بڵاوبوونەوەی تای خوێنبەربوون پڕ ئاڵنگارییە، بەتایبەتی لەکاتێکدا هیچ پێکوتەیەک نییە ڤایرۆسەکە کۆتایی پێبێنێت، بەڵام چەندین رێگە هەن بۆ کەمکردنەوەی ئەگەری تووشبوون، بۆ نموونە شوێنی کارکردن.
نابێت رێگەبدرێت ببێتە ژینگەیەکی لەبار بۆ جووڵەی مێشوولە. لەکاتی گەشت و گەڕان بە نێو هەرناوچەیەک کە مەترسیی بڵاوبوونەوەی ڤایرۆسەکەی لێدەکرێت، پێویستە پۆشاکی پێویست لەبەر بکرێت کە دەست و قاچ و رووخسار داپۆشێت. لەکاتی سەربڕینی هەر ئاژەڵێک پێویستە پۆشاک و دەستکێش بەکاربهێنرێت و دوای تەواوبوونی کارەکە، خۆمان و شوێنەکە بشۆین.
رێگەکانی خۆپارێزی لە چەند خاڵێکدا
پۆشینی پۆشاک و دەستکێش لەکاتی سەربڕینی ئاژەڵ
پۆشینی پۆشاکی قۆڵدرێژ لەو شوێنانەی گومانی بوونی ڤایرۆسەکەی لێدەکرێت
رشاندنی ژینگەی کارکردن
دوورکەوتنەوە لە ژینگەی گوماناوی
دوو هەفتە بەر لە سەربڕین، پشکنین بۆ ئاژەڵ بکرێت
دوورکەوتنەوە لە کەسی تووشبوو
دەستشۆردن لەدوای سەردانی نەخۆش
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ