پسپۆڕێکی چاو: پێش کردنەوەی قوتابخانە و باخچەی منداڵان پێویستە چاوی منداڵ بپشکێندرێت

 

د. ئەحمەد یەحیا، پسپۆڕی نەخۆشی و نەشتەرگەرییەکانی چاو بە رووداوی راگەیاند، ئەو منداڵانەی کە لە باخچە یان لە پۆلی یەکی بنەڕەتی وەردەگیرێن دەبێت پشکنینی چاویان بۆ بکرێت و ئاستی بینینیان دیاری بکرێت، چونکە ئەگەری هەیە منداڵەکە چاوی لاواز بێت و ئەگەر چارەسەر نەکرێت دەبێتەهۆی تەمبەڵیی چاو.

 

بە گوتەی ئەو پسپۆڕە، تەمبەڵیی چاو نەخۆشییەکی چاوە بەجۆرێک نەخۆش بێ چاویلکە و بەچاویلکەشەوە شتەکانی دەوروبەری بەسافی و روونی و سەد لەسەد نابینێت.

 

 

1- ئەگەر منداڵەکە چاوێکی یان هەردوو چاوی خێل بێت.

 

2- منداڵەکە هەردوو چاوی زۆر لاواز بێت یان چاوێکی لاوازتر بێت لە چاوەکەی دیکەی، ئەم جۆرەش لە هەموو جۆرەکان بەربڵاوترە، چونکە هیچ نیشانەیەکی دیاریکراوی نییە، لەبەر ئەوە نە منداڵەکە و نە دایک و باوکی منداڵەکەش هەستی پێناکەن، بەڵکو تەنیا بە پشکنین دەستنیشاندەکرێت.

 

3- ئەگەر منداڵەکە ئاوی سپیی هەبێت یان کێشەی گلێنەی چاوی هەبێت.

 

لە بەشێکی قسەکانیدا پسپۆڕەکە دەڵێت: ئەم نەخۆشیی چاوە ئەگەر زوو دەستنیشان نەکرێت و چارەسەری گونجاوی بۆ نەکرێت لە منداڵیدا کە گەورە بوو بەهیچ شتێک چارەسەر نابێت و دەبێتە دێوەزمەیەک لەسەر ژیانی ئەم نەخۆشە و بە بەردوامی خۆی بە کەم دەزانێت.

 

تەنانەت دەشڵێت: ''ئەگەری هەیە کاریگەری بکاتە سەر زیرەکیی منداڵەکەش''.

 

 

1- هەموو منداڵێک پێش ئەوەی بڕواتە باخچەی ساوایان دەبێت پشکنینی چاوی بۆ بکرێت.

 

2- هەموو منداڵێک پێش ئەوەی بڕواتە قوتابخانە دەبێت پشکنینی چاوی بۆ بکرێت.

 

3- پێویستە بەڕێوەبەری باخچەی ساوایان و قوتابخانەی بنەڕەتی هیچ منداڵێک وەرنەگرن، تاوەکو پشکنینی چاوی بۆ نەکرابێت.

 

4- دایکان و باوکان کەمتەرخەم نەبن لە سەر تەندروستیی چاوی منداڵەکانیان، چونکە ئەوان ئەمانەتن لە ئەستۆی ئێوە و چاو هەستیارترین ئەندامی جەستە و پارێزگاری لێبکەن.