بەشێک لەو منداڵانەی چوونەتە نووسینگەی لقی سلێمانیی کۆمەڵەی ئۆتیزمی کوردستان بۆ ئەوەی پزیشکی ددان بیانبینێت. وێنە: رووداو
رووداو - تەندروستی
پزیشکێکی ددان لەبارەی چارەسەرییەکانی پسپۆڕیی ددان بۆ منداڵانی ئۆتیزم دەڵێت: بەشێکی زۆری منداڵانی ئۆتیزم بەهۆی فرەجووڵەیی و کۆنتڕۆڵنەکردنیان پێویستە سڕکردنی گشتییان بۆ بکرێت، تەنانەت ئەگەر بۆ ددان دەرهێنانێکیش بێت.
ئەمڕۆ شەممە 17ـی ئابی 2024 دکتۆر رێژین کاوە، پزیشکی پایەبڵندی نەشتەرگەرییەکانی شەویلگە و روخسار بە رووداوی راگەیاند، 25٪ـی کەسانی ئۆتیزم رازین کە چارەسەرییەکانی دەم و ددانیان بۆ بکرێت و پێویستیان بە سڕکردنی گشتی نابێت، چونکە بەشێکی زۆریان دەبێت بە بەکارهێنانی سڕکردنی گشتی چارەسەربکرێن.
دکتۆر رێژین کاوە ئاشكرای دەکات، ئێستا سڕکردنی گشتی بەراورد بە 20 ساڵ لەمەوبەر زۆر سەلامەتترە و دایک و باوکان پێویست ناکات دوودڵ بن لە بەکارهێنانی بۆ منداڵەکانیان.
تەنانەت ئەو پسپۆڕە باسی ئەم هۆکارانەی خوارەوە دەکات کە بەهۆیەوە ئەو جۆرە منداڵانە زیاتر دووچاری کێشەکانی دەم و ددان دەبن وەکو؛
- خواردنی یەک جۆری خۆراک بۆ ماوەیەکی زۆر
- گوێڕایەڵی نەکردنی منداڵەکە بە رێنوێنییە تەندروستییەکان
- قورسیی ئەنجامدانی چارەسەرییەکانی دەم و ددان بۆ منداڵەکە
لە کۆتایی قسەکانیدا گوتی، خزمەتگوزارییە تەندروستییەکان بۆ منداڵانی ئۆتیزم کەمن و لەو روانگەیەوە پاڵپشتیی کەمیان دەکرێت، ''چونکە ئامێر و پێداویستیی گونجاو بۆ پزیشکانی ددان دابیننەکراون کە بتواندرێت خزمەتی زیاتر بە منداڵانی ئۆتیزم بکرێت''.
لە سلێمانی هەڵمەتێک بۆ پشکنینی ددانی منداڵانی ئۆتیزم راگەیێندرا و تیایدا ئەندامانی لقی سلێمانیی کۆمەڵەی ئۆتیزمی کوردستان سوودمەند دەبن کە لەلایەن بەشێک لە پزیشکانی سەندیکای ددانەوە پشکنینیان بۆ دەکرێت و بەپێی پێویست رەوانەی نۆرینگەکان دەکرێن، تاوەکو بەخۆڕایی چارەسەریان بۆ بکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ