رووداو دیجیتاڵ
دامەزراوەی کۆنتڕۆڵی جۆریی دەرمان (KMCA) رایگەیاند، دوو دەرمانیان لە بازاڕەکاندا کشاندووەتەوە، کە بۆ منداڵان بەکاردێت، دوای ئەوەی دەرکەوتووە کە مادەی زیانبەخشیان تێدایە.
ئەو دوو دەرمانە یەکێکیان قەترەی میلاتۆنینە و ئەوەی دیکەشیان قەترەی ئۆنۆرتۆنین. سەرچاوەیەک لە وەزارەتی تەندروسیی هەرێمی کوردستان بە رووداوی راگەیاند: "دوای دووبارە هەڵسەنگاندن، دەرکەوتووە ئەم دوو بەرهەمە ماددەی میلاتۆنینیان تێدایە، کە زیان بە منداڵان دەگەیێنێت، بۆیە فرۆشتنیان قەدەخەکرا."
دامەزراوەی KMCA لە راگەیێندراوێکدا لەبارەی ئەو دوو بەرهەمە رایگەیاندووە: بەڕێوەبەرایەتییەکەیان دوای دووبارە هەڵسەنگاندن و شیکردنەوەی تاقیگەیی بۆ دوو بەرهەمی دەرمانسازیی تەواوکەریی خۆراکی بە شێوەژەمی دەرمانسازیی قەترەی دەم کە ماددەی میلاتۆنینیان تێدابوو، دوای دەرچوونی ئەنجامەکان بە نەرێنی و دەرنەچوونیان "not comply" لە شیکردنەوەی تاقیگەیی، بڕیاری دا بە "کشاندنەوەیان و لەناوبردنیان".
سەرچاوەکەی وەزارەتی تەندروستی دەڵێت، ئەم دوو بەرهەمە دوای ئەوەی لەلایەن تیمەکانی تاقیگەکانی بەڕێوەبەرایەتیی KMCA شیکردنەوەی تەواوەتی تاقیگەییان بۆ کرا، دەرکەوت کە تەنۆلکەی بینراو "visible particle"یان تێدایە ئەوەش پێچەوانەی تایبەتمەندیی بەرهەمەکانە و شیاوی بەکارهێنان نین.
بە گوێرەی راگەیێندراوەکەی KMCA بەرهەمە دەرمانسازییەکان بریتین لە: (HONORTONIN drops) بە ژماره باچی (HNR1715) دروستکراوی کارگەی (HONOR) و (melatonin drops) بە ژمارە باچی (23B038) دروستکراوی کارگەی (inalme).
سەبارەت بە فرۆشتنی ئەو دوو بەرهەمە لە بازاڕەکاندا KMCA رایگەیاندووە: "پێشتر فرۆشتنیان لە بازاڕ راگیرابوو تاوەکو هەڵسەنگاندنی ئەنجامە نوێیەکان، هۆکاری خراپبوونی هەردوو بەرهەمەکەش، خراپ کۆگاکردن و گواستنەوەیان بووە."
دامەزراوەی کۆنترۆڵی جۆریی دەرمان رۆژی 21-08-2024 بە مەبەستی زیاتر هەڵسەنگاندن و شیکردنەوەی تاقیگەیی بڕیاریدابوو بە راگرتنی فرۆشتنی هەردوو دەرمانەکە.
دامەزراوەی KMCA سەرجەم دەرمانخانە و کۆگاکانی دەرمان لە سەرجەم شار و شارۆچکەکانی هەرێمی کوردستان ئاگاداردەکاتەوە، ئەو دوو بەرهەمە لە پشکنین دەرنەچوون و بەڕێکاری زانستی دەرمانسازی و ژینگەیی لەناودەبرێن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ