رووداو - تەندروستی
لە ئینگلاند پشکنینی پێشوەختە بۆ هەزاران کۆرپەی تازەلەدایکبوو دەکرێت و ئەمانجیش لە هەڵمەتەکە ئەوەیە کە دەستنیشانی نەخۆشییە دەگمەن و سکماکییەکان بکرێت.
هەڵمەتەکە 40 نەخۆشخانەی ئینگلاند دەگرێتەوە و لەلایەن ناوەندی خزمەتگوزاریی تەندروستیی نیشتمانیی NHS لە وڵاتەکە دەکرێت و بڕیارە، پشکنین بۆ 100 هەزار کۆرپەی تازەلەدایکبوو بکرێت، تاوەکو دەستنیشانی 200 نەخۆشی و ناڕێکیی بۆماوەیی بکرێت.
ئاماندا پریچارد، بەڕێوەبەری جێبەجێکاری ناوەندی NHS لە ئینگلاند دەڵێت: ''دەستنیشانکردنی پێشوەختەی حاڵەتەکان دەتوانێت ژیانی ماڵبات و بەخێوکارانی منداڵەکە بگۆڕێت و کوالێتیی ژیانیان باش بکات''.
تەنانەت ئاماندا دەشڵێت: پشکنینی پێشوەختە چارەسەرییەکان ئاساندەکات و وادەکات بە زوویی ناڕێکی و کێشە تەندروستییە بۆماوەیی و سکماکییەکان دەستنیشانبکرێن.
پلانەکە وەکو توێژینەوەیەکی گشتگیرە و لەلایەن کۆمپانیای Genomics England و NHSـەوە بەڕێوەدەچێت و لەڕێگەی دڵۆپی خوێنەوە پشکنینە بۆماوەییە وردەکان دەکرێن.
هاوکات NHS رایدەگەیێنێت، هەر منداڵێک لە پشکنینەکان دەرکەوت کە کێشەی هەیە، ئەوا چاودێری و پاڵپشتیی پزیشکی و دارایی دەکرێت و چارەسەری پێویستی بۆ ئەنجامدەدرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ