زانکۆی واشنتن: منداڵی ساوا زیاتر هەست بە قسەکردن دەکات بەراورد بە میوزیک

 

توێژەرانی زانکۆی واشنتن رایدەگەیێنن، توێژینەوەکەی زانکۆکە لەسەر منداڵانی خوار 2 ساڵ کراوە و دەرکەوت، منداڵی ساوا زمانی بۆ وشەکان زیاتر گەشە دەکات بەراورد بە میوزیک، منداڵی ئەو تەمەنانە زیاتر وشەکان لە دایکیانەوە وەردەگرن چونکە چاو لە دایکیان دەکەن و مامەڵەی زیاتریان لەگەڵدا هەیە.

 

کریستینا ژاو، سەرپەرشتیاری توێژینەوەکەیە و دەڵێت: بۆ ئەوەی زمانی مندآڵ زیاتر گەشە بکات، پێویستە دایک و باوک هەمیشە لە پەیوەندیدابن لەگەڵ منداڵ و قسەی لەگەڵدا بکەن.

 

بە گوێرەی پەیمانگای تەندروستیی نیشتیمانی لە ئەمریکا هەنگاوەکانی گەشەسەندی زمان لە منداڵێکی ئاسایی بەم شێوەییە: 

 

0-3 مانگ: کۆرپە دەنگی دایک و باوک دەناسێتەوە و دەنگێک دروست دەکات.

 

4-6 مانگ: وەڵامی گۆڕانی تۆن دەدەنەوە، بە چاوەکانیان شوێن دەنگەکان دەکەون و قسە دەکەن.

 

7 مانگ تا 1 ساڵ: لە وشەی سەرەتایی تێدەگەن و وەڵامی داواکاری سادە دەدەنەوە و دەست بەکاردێنن بۆ دەربڕین.

 

1-2 ساڵ: لە پرسیارە سەرەتاییەکان تێدەگەن، بەدوای چیرۆکەکاندا دەگەڕێن و بە بەردەوامی وشەی نوێ فێردەبن، دەست دەکەن بە کۆکردنەوەی وشەکان بۆ پرسیارکردن یان دەربڕینی پێداویستییەکان.

 

2-3 ساڵ: دەست دەکەن بە گرێدانی دەستەواژەکان بەیەکەوە و بە شێوەیەکی یەکگرتوو قسە دەکەن، دەتوانن ئاماژە بە زۆربەی شتەکانی دەوروبەریان بکەن.

 

3-4 ساڵ: دەتوانن باسی چالاکییەکان بکەن، رستەی ئاڵۆزتر بەکاربهێنن و بە شێوەیەکی رەوانتر قسە بکەن.

 

4-5 ساڵ: چیرۆک دەگێڕنەوە و دەتوانن بە ئاسانی پەیوەندی لەگەڵ کەسانی دیکەدا بکەن.