دیمانەی شانۆیی لە ئەڵمانیا بەڕێوەدەچێت

 

 

رزگار مونزیر، بەڕێوەبەری هونەریی گرووپی کابارێتی کوردی و رێکخەری دیمانەکە لە ستۆدیۆ میوانی دیاسپۆرا بوو. لەبارەی دیدارەکەوە رایگەیاند، لەپێناو ناوێکی سەرنجڕاکێش "ناوی دیدارەکەمان کردە دیمانەی شانۆیی، گرووپی کابارێتی کوردی سەرپەرشتیی دەکات کە ماوەی چوار ساڵە لە ئەڵمانیا دامەزراوە و چالاکانە کاری خۆ دەکات."

 

بەڕێوەبەری هونەریی گرووپی کابارێتی کوردی و رێکخەری دیمانەکە گوتیشی، "سەرکێشی و ئیڤێنتێکە تێیدا سێ شانۆ نمایش دەکرێن، یەکێکیان لە کەلارەوە، دووانەکەی دیکەش لێرەوە نمایش دەکرێن، دەمانویست ژمارەی شانۆکان لە کوردستانەوە زیاتر بن، بەڵام بەهۆی نەبوونی ڤیزاوە نەمانتوانی."

 

ئیڤێنتەکە لە شاری کالە لە ئەڵمانیا بەڕێوەدەچێت و ماوەی سێ رۆژ دەخایەنێت، لە 28ی ئەم مانگە دەستپێدەکات و تاوەکو 30 مانگ دەبێت.

 

بەڕێوەبەری هونەریی گرووپی کابارێتی کوردی روونیکردەوە، هەموو رۆژێک شانۆیەک نمایش دەکرێت و لەگەڵیشیدا وۆرکشۆپێک یان دیدارێک بەڕێوەدەچێت، "ئەوانەی بەنیازن بێن بۆ بینینی کار و چالاکییەکانمان، دەتوانن لە رێگەی هەژماری ئێمە لە تۆڕە کۆمەڵایەتییەکان بەناوی (Kurdish diaspora) زانیاری وەربگرن، یاخود لە رێگەی ژمارە مۆبایلەکانمان کە لەسەر پەڕەی تۆڕە کۆمەڵایەتییەکانمان نووسراون پەیوەندیمان پێوە بکەن."