مالمیمە نمایشێکی هونەری دەباتە نێو شەقامێکی جەنجاڵی کۆڵن

 

لە نمایشە هونەرییەکەدا جگە لە مالمیمە، دوو نمایشکاری دیکە بەشداربوون و بە دانانی دەمامک لە پشتی سەریان، هەوڵی گەیاندنی پەیامی کارەکەیان دا.

 

مالمیمە، بە تۆڕی میدیایی رووداوی راگەیاند، هونەرمەند کاری ئەوە نییە تەنیا لە نێو هۆڵ و ستۆدیۆکاندا کار بکات، بەڵکو ئەرکییەتی بچێتە نێو خەڵک و هونەرەکەیان پێشکێش بکات.

 

روونیشیکردەوە، پەیامی کارە هونەرییەکە لەبارەی نەژادپەرستییە، هەروەها باس لەوە دەکات دیموکراسییەت لە کوێ دەستپێدەکات و لە کوێ کۆتایی دێت.

 

ئەو هونەرمەند کوردە، ئاماژەی بۆ ئەوەشکرد، لە ماوەی داهاتوودا ڤیدیۆی کارە هونەرییەکە بە مۆنتاژ و کوالیتێکی بەرز بەرهەمدەهێنێت و بڵاودەکرێتەوە.

 

مالمیمە دوای کردنەوەی دەیان پێشانگەی شێوەکاری لە وڵاتانی ئەوروپا، لە ئایاری 2024 یەکەم پێشانگەی تایبەتیی لە هەولێری باشووری کوردستان کردەوە.

 

لەبارەی دووبارە سەردانی بۆ باشووری کوردستان گوتی، بەنیازە لە ماوەی داهاتوودا بۆ پڕۆژەیەکی هونەری دووبارە سەردانی کوردستان بکاتەوە.

 

مالمیمە، ناوی تەواوی حەسەن حوسێنە و لە 1972 لە ئەنەتۆڵیای ناوین لە تورکیا لەدایکبووە، نازناوی مالمیمەی لە ناوی ماڵباتەکەی وەرگرتووە، لە 1994 رووی لە ئەڵمانیا کردووە، هەر لە وڵاتە لە بواری هونەری شێوەکاری خوێندوویەتی، خاوەنی دەیان پێشانگەی تایبەت و هاوبەشە لە ئەوروپا.