رووداو دیجیتاڵ
بەهۆی مەترسییەکانی کۆرۆنا، خولی ئەمساڵی رێوڕەسمی دابەشکردنی خەڵاتەکانی گۆڵدن گڵۆب بەڕێوە نەچوو و خەڵاتەکان بەشێوەی ئۆنلاین راگەێێندران، هەردوو فیلمی سینەمایی 'West Side Story' و 'The power of dog' پشکی شێریان لە خەڵاتەکانی بەرکەوت.
79مین رێوڕەسمی دابەشکردنی خەڵاتەکانی گۆڵدن گڵۆب، بەرەبەیانی ئەمڕۆ دووشەممە 10-1-2022 بەشێوەی ئۆنلاین بەڕێوەچوو، بۆیە فەرشی سوور و پەخشی تەلەڤزیۆنی لە خولی ئەمساڵدا نەبوو و خەڵاتەکان لەرێگەی تۆرە کۆمەڵایەتییەکان بڵاوکرانەوە.
فیلمی سینەمایی 'West Side Story' لە دەرهێنانی ستێڤن سپیلبێرگ، خەڵاتی باشترین فیلمی کۆمێدی یاخود میوزیکی بردەوە، خەڵاتی باشترین ئەکتەری ژن بۆ رێیچێل زەگلەر و خەڵاتی باشترین ئەکتەری یاریدەدەری ژن بۆ ئاریانا دێبۆز بەدەستهێنا.
هەروەها فیلمی سینەمایی 'The power of dog' کە بەرهەمی تۆڕی نێتفلێکسە، خەڵاتی باشترین فیلمی درامایی بەدەستهێا، خەڵاتی باشترین دەرهێنەریش بۆ جێن کامپیەن و خەڵاتی هاندان بە کۆدی سمیت، ئەکتەری ئۆسترالی بوو.
ویل سمیس، ئەکتەری ئەمریکی لەرێگەی فیلمی سینەمایی 'King Richard' خەڵاتی باشترین ئەکتەری پیاو لە بەشی سەرەکیدا و نیکۆڵ کیدمان، ئەکتەری ئۆسترالی، خەڵاتی باشترین ئەکتەری ژنی لە بەشی سەرەکیدا وەرگرت.
فیلمی ژاپۆنی 'Drive My Car' خەڵاتی باشترین فیلمی بیانی و فیلمی 'Encanto' خەڵاتی باشترین ئەنیمەیشنی بەدەستهێنا.
زنجیرەی تەلەڤزیۆنیی 'Succession' خەڵاتی باشترین درامای تەلەڤزیۆنی و زنجیرەی 'Hacks' خەڵاتی باشترین زنجیرەی تەلەڤزیۆنیی کۆمیدی بەدەستهێنا.
ئۆ یۆنگ سۆ، ئەکتەری زنجیرەی تەلەڤزیۆنیی کۆرۆیای باشوور، ' Squid Game' خەڵاتی باشترین ئەکتەر لە رۆڵی دووەم لە بەشی پیاواندا بەدەستهێنا، بەمەش بووەی یەکەم ئەکتەری کۆری خەڵاتی گۆڵدن گڵۆب وەربگرێت.
لە 13 کانوونی یەکەمی 2021، بەرهەمە بەربژێرکراوەکان بۆ خەڵاتی گۆڵدن گلۆب ئاشکرا کران.
یەکەم رێوڕەسمی خەڵاتەکانی گۆڵدن گڵۆب لە 1944 لەلایەن کۆمەڵەی هۆلیوود بۆ رۆژنامەوانی بیانی بەڕێوەچوو و بەر لە خەڵاتی ئۆسکار دابەشدەکرێت و براوەی ئەوخەڵاتە، چانسی زیاتری بۆ بردنەوەی خەڵاتی ئۆسکاریش دەبێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ