رووداو - هەولێر
خێزانەكەی خەڵكی رۆژهەڵاتی كوردستانن و لە باشوور نیشتەجێن، خۆی لە هەولێر لەدایك بووە و باوكی پێشمەرگەی حیزبی دیموكراتە، ئازیتا لوقمان یەكەمی بەرنامەیەكی پێشبڕكێی دەنگخۆشی بوو بەناوی "كوردستان كیدس ڤۆیس". خەونی هەرە گەورەی ئەو ئەوەیە ببێتە هونەرمەندێكی بەناوبانگ لەكاتێكدا پێشبینی ئەوەی نەكردبوو كە یەكەمی بەرنامەكە بێت. ئازیتا دوای ئەوەی بووە یەكەمی بەرنامەكە، ناوبانگی بڵاوبووەتەوە. لە هەڤپەیڤینێكدا لەگەڵ (رووداو) باسی پلانەكانی خۆی دوای پێشبڕكێیەكە دەكات.
رووداو: دوای ئەوەی لە بەرنامەی (كوردستان كیدس ڤۆیس) بەشداریت كرد و یەكەم بووی، چ گۆڕانكارییەك بەسەر ژیانتدا هاتووە؟
ئازیتا لوقمان: باوەڕم نەدەكرد یەكەم بم، چونكە بەڕاستی كەسانی بەهێز لە قۆناغی كۆتاییدا بوون، بەڵام یەكەمبوون هەستێكی زۆر خۆشی پێدام. كە دەڵێم باوەڕم نەدەكرد یەكەم بم مەبەستم ئەوە نەبوو كە متمانەم بەخۆم نەبوو، بەڵام ركابەرییەكە بەهێز بوو.
رووداو: ئێستا تا رادەیەك ناسراویت، ئەمە كاریگەری نەكردووەتە سەر خوێندنەكەت؟
ئازیتا لوقمان: مامۆستا و قوتابییە هاوڕێكانم لە قوتابخانە منیان خۆشدەوێت، زۆر جار داوام لێدەكەن گۆرانییان بۆ بڵێم، كاریگەری خراپی نەكردووەتە سەر خوێندنەكەم، بگرە خۆشەویستتری كردووم.
رووداو: دەتەوێت لە داهاتوودا لە بواری هونەردا بخوێنی؟
ئازیتا لوقمان: جارێ ئەوە نازانم، دڵنیام حەز دەكەم زۆر بە باشی لە كاری هونەریدا پێشبكەوم و سەركەوتوو بم، حەز دەكەم بوارەكە بە شێوەیەكی ئەكادیمی بخوێنم، بەڵام زۆر بۆچوونی جیاواز دەبیستم لەو بارەیەوە، بۆیە نامەوێت ئێستا هیچ بڵێم.
رووداو: لە بۆنەكان و بەرنامەكاندا گۆرانی چەند هونەرمەندێكت گوتووەتەوە، كەسیان تێبینییان هەبووە لەسەری؟
ئازیتا لوقمان: لەیلا فەریقیم بینی، زۆر دەستخۆشی لێكردم لە بارەی دەنگم، گوتی كە گۆرانییەكەی ئەوم باشی گوتووەوە و بەگشتی دەستخۆشی لێكردم، هیچكام لە هونەرمەندەكانیش بۆچوونی خراپیان نەگوتووە، هەموو ئەوانەی قسەیان كردووە و پێمگەیشتوون دەستخۆشین.
رووداو: تۆ تەمەنێكی بچووكت هەیە، كێ لە كارەكان یارمەتیت دەدات؟
ئازیتا لوقمان: براكەم بە تایبەتی و باوكیشم، ئەوان زۆر بە منەوە ماندوون، بۆ هەموو شوێنێك كە پێویستە دەمبەن و دەمهێنن، زۆر هاوكاریم دەكەن و پلانی كارەكانم بۆ دادەنێن، ئەگەر ئەوان نەبوونایە من نەمدەتوانی تا ئەم ئاستەی ئێستا بێم و بەردەوام بم.
رووداو: ناوبانگ و كاری هونەری تا ئێستا داهاتێكی ماددی بۆ پەیداكردووی؟
ئازیتا لوقمان: راستییەكەی نەخێر، تا ئێستا هیچ داهاتێكم لەو بوارەدا دەستنەكەوتووە، بەڵام داواكاری زۆر هەبووە بۆ ئەوەی لایڤ میوزیك بكەم.
رووداو: بۆچی نەتكردووە؟
ئازیتا لوقمان: پێشتر ئامادە نەبووم بۆ ئەو كارە، بەڵام ئێستا پلانمان هەیە كە لە داهاتوودا دەست بە لایڤ میوزیك بكەم.
رووداو: چەند پارە وەردەگری بۆ لایڤ میوزیك؟
ئازیتا لوقمان: نازانم، باوكم دەزانێت
رووداو: بەنیاز نیت گۆرانی بڵاوبكەیتەوە؟
ئازیتا لوقمان: ئێستا كارێكی گۆرانی ئامادەیە، دەمانەوێت كلیپی بكەین و بڵاوی بكەینەوە، لە داهاتووشدا چەند گۆرانییەك بۆ منداڵان و نیشتمان تۆمار دەكەم و بڵاویان دەكەمەوە.
رووداو: گۆرانیی خۆشەویستی ناڵێیت؟
ئازیتا لومان: با دەیڵێم، بۆچی نا، ئامادەكاریشمان كردووە، ئەو گۆرانییەی كە ئامادەكراوە گۆرانییەكی عاشقانەیە، بەڵام نازانم كە دەبێتە یەكەم گۆرانی بڵاوكراوەی من یاخود نا.
رووداو: خەون بە چییەوە دەبینی؟
ئازیتا لوقمان: حەز دەكەم ببمە هونەرمەندێكی سەركەوتوو، خوێندن تەواو بكەم، بەڵام لە هونەر دانەبڕێم و كارەكانم بە باشی بكەم.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ