رووداو - ئیستەنبووڵ
هونەرمەند ئیبراهیم تاتڵیسەس سکاڵای یاسایی تۆمارکرد و رایگەیاند، کەسانێک هەڕەشەیان کردووە و گوتوویانە کوڕەکەت دەکوژین.
میدیاکانی تورکیا بڵاویانکردەوە، هونەرمەندی ناسراوی تورکیا، ئیبراهیم تاتڵیسەس سکاڵای تۆمارکردووە.
هەر بەپێی هەواڵەکان لە ژمارەیەکی نەناسراوەوە پەیوەندی بە کۆمپانیای تایبەت بە ئیبراهیم تاتڵیسەس و کوڕەکەیەوە کراوە و گوتراوە:"ئیدۆی کوڕی ئیبراهیم تاتڵیسەس دەکوژین''. دواتر پەیوەندیکاران راستەوخۆ تەلەفۆنەکەیان داخستووەتەوە.
لەگەڵ زانینی ئەمە ئیبراهیم تاتڵیسەس لەڕێی پارێزەرەکەیەوە سکاڵای یاسایی تۆمارکرد و لایەنی پەیوەندیداری لە بوونی هەڕەشەیەکی وەها ئاگادارکردەوە.
پارێزەرەکەی تاتڵیسەس گوتی، تاوەکو ئێستا چەندینجار هەڕەشەیان لە هەردوو کوڕەکەی تاتڵیسەس، ئیدۆ و ئەحمەد کردووە.
ئیبراهیم تاتلیسەس داوای لە دادوەر کرد ئاسایشی کوڕەکانی بپارێزرێت، دادوەریش وەکو یەکەم هەنگاو بڕیاری لێکۆڵینەوەی لە پەیوەندییە تەلەفۆنییەکە دەرکرد.
ئیبراهیم تاتڵیسەس لە 1-1-1952 لە شاری ئورفای باكووری كوردستان لە ماڵباتێكی كوردی لە دایكبووە، بەڵام زۆرتر لە شارە توركییەكان بە تایبەتیش ئیستەنبووڵ ژیاوە و هەر بە توركیش قسەی كردووە و گۆرانییەكانی تۆماركردوون، بۆیە زیاتر وەك هونەرمەندێكی تورك دەناسرێ.
ئیبراهیم تاتڵیسەس خاوەنی زیاتر لە 40 ئەلبوومی گۆرانییە و بە ئیمپراتۆڕی هونەری گۆرانیی توركی ناسراوە. بەشداری چەندین فیلمی كردووە. ئەو جگە لە كاری هونەری سەرقاڵی كاری بازرگانیش بوو.
تاتڵیسەس لەساڵی 2011 لە هەوڵێكی كوشتن رزگاری بوو، بەڵام بەشێكی جەستەی لەكاركەوت و تاوەكو ئێستاش چارەسەری وەردەگرێت.
داڕشتنەوە؛ راوچی حەسەن
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ