دوو هاوژین لە دهۆک پارەی کڕینی کەلوپەلی جەژنیان دەدەنە هەژارێک

نەوزاد و سوعاد پێنج ساڵە ژیانی هاوژینییان پێکهێناوە، ئەمساڵ بڕیاریانداوە بە ئۆنلاین جەژن بکەن و سەردانی کەسوکاریان نەکەن، نەوزاد ھلووری، دانیشتووی دهۆکە و دەڵێت "ئەو بڕە پارەیەی بۆ کەلوپەلی جەژن داماننابوو نزیکەی 100 هەزار دیناربوو، بەڵام لەگەڵ خێزانم بڕیارماندا بیدەینە ماڵێکی هەژار". 

 

ئەمە لەکاتێکدایە بڵاوبوونەوەی کۆرۆنا زیانی لە بازاڕەکانی دهۆک داوە، زۆربەی ئەو خاوەن دووکانانەی قسەیان بۆ رووداو کردووە دەڵێن، بازاڕیان بەراورد بە جەژنەکانی پێشوو 60% بۆ %70 دابەزیوە.

 

بازاڕی جلوبەرگ، شیرینی و چەرەسات زۆرترین زیانیان پێکەوتووە، لە دووکانەکان هەست بە قەرەباڵخی ناکرێت، دیار دۆسکی 10 ساڵە بازرگانی جلوبەرگە، ئەمساڵ بایی 100 هەزار دۆلار جلوبەرگی کڕیوە، بەڵام دەڵێت، تەنها 10%ـی جلوبەرگەکەی فرۆشتووە.

 

بەپێی بەدواداچوونەکانی رووداو، لە رەمەزانی ساڵی رابردوو 300 تاوەکو 400 تۆن چکلێت و 400 تاوەکو 500 تۆن چەرەسات لە پارێزگای دهۆک فرۆشراون.