رووداو دیجیتاڵ
نرخی بیتکۆین زیاتر لە دوو هەزار دۆلاری دیکە بەرزبووەوە؛ قەبارەی بازاڕەکەشی گەیشتە زیاتر لە ترلیۆنێک دۆلار.
ئەمڕۆ چوارشەممە، 14-02-2024، نرخی بیتکۆین دوو هەزار و 180 دۆلار بەرزبووەوە و هەر بیتکۆینێک بە 51 هەزار و 750 دۆلار مامەڵەی پێوەکرا.
ئەمە بەرزترین ئاستی نرخی بیتکۆینە لە کانوونی یەکەمی ساڵی 2021ـەوە. بەپێی ماڵپەڕی CoinMarketCap کە تایبەتە بە دراوە دیجیتاڵییەکان، بەهۆی بەرزبوونەوەکەی ئەمڕۆوە، تەنیا قەبارەی بازاڕی بیتکۆین گەیشتە زیاتر لە ترلیۆنێک دۆلار. لە کۆتاییەکانی 2021ـەوە یەکەمجارە قەبارەی بازاڕی بیتکۆین بگاتە ترلیۆنێک دۆلار.
تەنیا لە سەرەتای ئەمساڵەوە نرخی بیتکۆین 21٪ بەرزبووەتەوە؛ لە ساڵی رابردوویشدا 150٪ بەرزبووەوە، بە جۆرێک لە 18 هەزار دۆلار لە سەرەتای 2023 گەیشتە 44 هەزار دۆلار لە کۆتایی ساڵەکە.
بەرزبوونەوەی نرخی بیتکۆین دوای ئەوە هات، 11ـی مانگی رابردوو، لیژنەی ئاڵوگۆڕی ئەمریکا داواکاریی چەند کۆمپانیایەکی بۆ دروستکردنی سندووقی دراوە دیجیتاڵییەکان لە بۆرسەی وڵاتەکە دەرکرد کە بە هەنگاوێک بۆ رێکخستن و بەدامەزراوەییکردنی بیتکۆین لێکدەدرێتەوە.
بەپێی دامەزراوەی کۆین شێرز کە تایبەتە بە دراوە دیجیتاڵییەکان، لە هەفتەی رابردوودا بەهۆی دروستکردنی پێنوێنی نرخی بیتکۆین لە بۆرسەی ئەمریکا، زیاتر لە ملیارێک و 100 ملیۆن دۆلار چووەتە نێو کەرتەکە.
لە لایەکی دیکەوە، شارەزایانی بوارەکە هۆشداری لە دابەزینی نرخی بیتکۆین دەدەن لە مانگەکانی داهاتوودا، ئەوەش بەهۆی ئەگەری مایەپووچبوونی دامەزراوەی GBTC تایبەت بە دراوە دیجیتاڵییەکان و چوونە دەرەوەی ملیارێک و 600 ملیۆن دۆلاری وەبەرهێنەرانی کۆمپانیاکە لە سێکتەری دراوە دیجیتاڵییەکان.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ