رووداو دیجیتاڵ
دوای 22 رۆژ لە وەستانی چالاکییە بازرگانییەکانی بەهۆی سەردانی زیارەتکارانی شیعە بۆ عێراق، دەروازەی سنووریی میهران لە رۆژهەڵاتی کوردستان بەڕووی چالاکییە بازرگانییەکاندا کرایەوە.
رووحوڵڵا غوڵامی، بەڕێوەبەری گومرگی پارێزگای ئیلام رۆژی دووشەممە (11ـی ئەیلوولی 2023) رایگەیاند، چالاکییە بازرگانییەکانی دەروازەی سنووریی میهران، کە بەهۆی چلەی ماتەمینیی ئیمام حوسێن بەشێوەیەکی کاتی راگیرابوون، لە رۆژی دووشەممەوە دەستیانپێکردەوە.
ئەمساڵ بە بڕیاری قایمقامییەتی شاری میهران و وەکو ئاسانکارییەک بۆ زیارەتکارانی ئێرانی کە بە بۆنەی چلەی ماتەمینیی ئیمام حوسێن سەردانی مەزاری ئیمامەکانی شیعەیان لە عێراق دەکرد، دەروازەی سنووریی میهران بۆ ماوەی 22 رۆژ بە رووی چالاکییە بازرگانییەکاندا داخرا.
عەلی عەباس شافیعی، قایمقامی شاری میهرانی سەر بە پارێزگای ئیلام، ئەو کاتە لە لێدوانێکدا بۆ میدیای فەرمیی ئێران رایگەیاند، لە رۆژی دووشەممە، 21ـی ئابی 2023، تاوەکو 11ـی ئەیلوولی 2023، هەموو چالاکییە بازرگانییەکانی دەروازەی سنووریی میهران رادەگیرێن، هەروەها هاتووچۆی گەشتیارانی ئاساییش لەو سنوورەوە دەوەستێنرێت.
دەروازی سنووریی میهران یەکێکە لە گرنگترین دەروازە سنوورییەکانی رۆژهەڵاتی کوردستان و ئێران، کە ساڵانە زۆرترین هەناردەی دەروازە سنوورییەکانی ئێران لەوێوە دەکرێت.
بەڕێوەبەری گومرگی پارێزگای ئیلام باسی ئاماری هەناردەکردنی کەلوپەلی لە دەروازەی سنووریی میهرانەوە کرد و رایگەیاند، لە پێنج مانگی رابردوودا زیاتر لە یەک ملیۆن و 349 هەزار تۆن کەلوپەل بە بەهای 746 ملیۆن دۆلار لەو سنوورەوە هەناردەی عێراق کراوە.
ئاماژەی بەوەش کرد گومرگی دەروازەی سنووریی میهران لەو پێنج مانگەدا 26 ملیار تمەن داهاتی هەبووە، کە بەراورد بە ساڵی رابردوو بەڕێژەی 29% زیادی کردووە.
رۆژی یەکشەممە، 20-08-2023، بەڕێوەبەری گومرگی پارێزگای ئیلام رایگەیاند، 25٪ـی هەموو هەناردەی رێگەی وشکانیی ئێران، لە دەروازەی سنووریی میهرانەوەیە و گوتی، ساڵی رابردوو سێ ملیۆن و 200 هەزار تۆن کەلوپەل، کە بایی یەک ملیار و 600 ملیۆن دۆلاری ئەمریکی بووە، لە رێگەی ئەو دەروازە سنوورییەوە هەناردە کراوە.
سەبارەت بە ژمارەی گەشتیارانیش رووحوڵڵا غوڵامی گوتی، پار، پێنج ملیۆن و 821 هەزار کەس لەو دەروازە سنوورییەوە هاتووچۆیان کردووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ