رووداو دیجیتاڵ
بەڕێوەبەری گشتیی ئاو و ئاوەڕۆی هەرێمی کوردستان دەڵێت، ماوەی مانگێک لێخۆشبوونی کرێی ئاویان درێژکردووەتەوە و هاونیشتمانییان دەتوانن تاوەکو 10ـی حوزەیران لەو لێخۆشبوونە سوودمەندبن. دەشڵێت، تاوەکو ئێستا زیاتر لە 12 هەزار هاوبەش لە لێخۆشبوونی قەرزەکە سوودمەند بوون.
رۆژی سێشەممە، 9ـی ئایاری 2023، ئاری ئەحمەد، بەڕێوەبەری ئاو و ئاوەڕۆی هەرێمی کوردستان بە تۆڕی میدیایی رووداوی گوت، بڕیاریانداوە لێخۆشبوونی رێژەی 15%ـی کرێی ئاو بۆ مانگێکی دیکە درێژ بکەنەوە و تاوەکو 10ـی حوزەیران هاونیشتمانییان بتوانن سوودی لێ ببینن.
ساڵی رابردوو سێ جار بڕیاری لێخۆشبوونەکە درێژکرایەوە؛ ئەمساڵ دوایین کات سبەی 10ـی ئایار دیاریکرابوو؛ ئاری ئەحمەد گوتی: "ئەمڕۆ بڕیارماندا جارێکی دیکە بۆ مانگێک بڕیاری لێخۆشبوونەکە درێژبکەینەوە، ئەوەش لە بەرژەوەندیی هاووڵاتییان، چونکە هاووڵاتی ئێستاش نەیداتەوە و قەرزی لەسەر بێت، دواجار هەر دەبێ بیداتەوە".
بەڕێوەبەری گشتیی ئاو و ئاوەڕۆی هەرێمی کوردستان ئاماژەی بەوەشکرد، بەهۆی لێخۆشبوونەکانەوە تاوەکو ئێستا زیاتر لە 12 هەزار هاوبەشی ئاو لە بڕیارەکە سوودمەند بوون.
بەگوێرەی ئاماری ئاو و ئاوەڕۆی هەرێمی کوردستان، لە ساڵی 2021دا نزیکەی 42 ملیار دینار قەرزی کرێی ئاو لە هەر 14 بەڕێوەبەرایەتییەکەی ئاو کۆکراوەتەوە؛ ئەو ژمارەیە لە 2022 زیادیکردووە بۆ 63 ملیار دینار.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ