رووداو دیجیتاڵ
ئەمڕۆ بەهای دینار بەرامبەر بە دۆلار دابەزی و 100 دۆلار لە 149 هەزار دینار نزیکبووەوە، بەڵام لەکاتی داخستندا 100 دۆلار بە 148 هەزار و 100 دینار بوو.
رۆژی دووشەممە 05-06-2023، حاجی سابیر باواجی، ئەندامی ئەنجوومەنی گۆڕینەوەی دراوی هەولێر بە تۆڕی میدیایی رووداوی راگەیاند: "ئەمڕۆ لەکاتی کردنەوەی بازاڕدا، 100 دۆلار بە 147 هەزار و 900 دینار بوو، دواتر بەهای دینار بەرامبەر بە دۆلار زیاتر دابەزی و گەیشتە 148 هەزار و 700 دینار، بەڵام لەکاتی داخستندا بەهای دینار کەمێك بەرزبووەوە، 100 دۆلار بە 148 هەزار و 100 دینار مامەڵەی پێوەکرا."
لەبارەی هۆکاری دابەزینی بەهای دینار بەرامبەر دۆلار، حاجی سابیر باواجی دەڵێت: "لە بازاڕدا خواست لەسەر دۆلار زۆرە، ئەو بڕەشی بانکی ناوەندی، بەتایبەتی ئەمڕۆ خستیەڕوو، زۆر کەمە."
ئەمڕۆ بانکی ناوەندیی عێراق 222 ملیۆن و 937 هەزار و 687 دۆلاری خستەڕوو کە 206 ملیۆن و 377 هەزار دۆلار و 687 دۆلاری بە شێوەی حەواڵە و 16 ملیۆن و 560 هەزار دۆلاریشی بەشێوەی کاش بوو.
لەبارەی بڕیاری نوێی بانکی ناوەندیی عێراق بۆ سیستمی پارەدانی ئەلیکترۆنی (POS)، ئەندامەکەی ئەنجوومەنی گۆڕینەوەی دراوی هەولێر دەڵێت: "ئەگەر ئەو بڕیارە بچێتە بواری جێبەجێکردنەوە و کاری پێبکرێت، کاریگەریی ئەرێنیی لەسەر بەرزبوونەوەی بەهای دینار بەرامبەر بە دۆلار دەبێت."
لە 20-12-2020 بانکی ناوەندیی عێراق بڕیاریدا نرخی فرۆشتنی هەر دۆلارێکی ئەمریکی لە 1180 دینارەوە بۆ 1460 دینار زیاد بکات، تاوەکو نزیکەی دوو ساڵ بەهای دینار جێگیر بوو، تاوەکو رۆژی 11-12-2022 نرخی 100 دۆلاری ئەمریکی 150 هەزار دیناری عێراقیی تێپەڕاند. دواتر بانکی ناوەندیی عێراق بڕیاری دا 100 دۆلار بە 131 هەزار دینار بە بانک و کۆمپانیاکان بفرۆشێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ