رووداو دیجیتاڵ
دوای ئەوەی دوێنێ لەکاتی داخستنی بازاڕدا بەهای 100 دۆلار گەیشتە زیاتر لە 152 هەزار و 500 دینار، ئەمڕۆ لەکاتی داخستندا بەهای دینار بەرامبەر بە دۆلار بەرزبووەوە و 100 دۆلار بۆ 151 هەزار دینار دابەزی. ئەندامانی بازاڕی دراوی هەولێر و سلێمانیش دەڵێن، ئەگەر بانکی ناوەندی خستنەڕووی دۆلار بە کاش زیاد بکات، بەهای دینار زیاتر بەرزدەبێتەوە.
رۆژی چوارشەممە، 2.8.2023، حاجی سابیر باواجی، ئەندامی ئەنجوومەنی گۆڕینەوەی دراوی هەولێر بە تۆڕی میدیایی رووداوی راگەیاند، ئەمڕۆ لەکاتی کردنەوەی بازاڕی دراوی هەولێر، 100 دۆلار بە 152 هەزار و 150 دینار بوو، بەڵام لەکاتی داخستندا بەهای دینار بەرزبووەوە و 100 دۆلار بە 151 هەزار دینار مامەڵەی پێوەکرا.
بە گوتەی حاجی سابیر، پێش کاتی داخستن، بەهای 100 دۆلار بۆ خوار 151 هەزاریش دابەزیبوو و گەیشتبووە 150 هەزار و 800 دینار. بەم پێیە، تەنیا لە بازاڕی دراوی هەولێر، بەهای 100 دۆلار هەزار و 150 دینار بەرزبووەتەوە.
ئەمە لەکاتێکدایە دوێنێ لەکاتی داخستنی بازاڕدا 100 دۆلار بە 152 هەزار و 600 دینار بوو.
ئەمڕۆ بانکی ناوەندیی عێراق 222 ملیۆن و 888 هەزار و 377 دۆلاری خستە بازاڕەوە؛ 176 ملیۆن و 388 هەزار و 377 دۆلاری بە شێوەی حەواڵە و، 45 ملیۆن و 500 هەزار دۆلاریشی بە شێوەی کاش بوو.
ئەو ئەندامەی ئەنجوومەنی گۆڕینەوەی دراوی هەولێر گوتی، هۆکاری سەرەکیی بەرزبوونەوەی بەهای دینار زیادبوونی خستنەبازاڕی کاشە لە لایەن بانکی ناوەندییەوە و دەشڵێت، ئەگەر بەردەوام بێت لە زیادکردنی خستنەبازاڕی کاش، رەنگە بەهای 100 دۆلار بۆ 150 هەزار دینار یان کەمتریش دابەزێت.
هاوکات جەبار گۆران، گوتەبێژی بازاڕی دۆلاری سلێمانی بە رووداوی گوت، ئەمڕۆ لەکاتی کردنەوەی بازاڕدا لە سلێمانی، 100 دۆلار بە 151 هەزار و 900 دینار بوو، بەڵام لەکاتی داخستندا 100 دۆلار بە 151 هەزار و 250 دینار مامەڵەی پێوەکرا.
جەبار گۆران بە هەمانشێوە هۆکاری بەرزبوونەوەی بەهای دینار بۆ زیادبوونی خستنەبازاڕی کاش دەگێڕێتەوە و دەڵێت، رەنگە بەیانیش بانکی ناوەندیی نزیکەی هەمان بڕی دۆلار بە شێوەی کاش بخاتە بازاڕەوە و بەهای دینار بەرامبەر بە دۆلار زیاتر بەرزببێتەوە.
گوتەبێژی بازاڕی دۆلاری سلێمانی باسی لەوەشکرد، لە ئەگەری خستنەڕووی هەمان بڕی کاش یان زیاتر، رەنگە بەهای 100 دۆلار بۆ 150 هەزار دینار دابەزێت. گوتیشی، بۆ بەردەوامیی بەرزبوونەوەی بەهای دینار، دەبێت بۆ ماوەیەک خستنەڕووی کاش زیادبکرێت.
جەبار گۆران دەڵێت، بازاڕ خاوبوونەوەی پێوەدیارە. ئاماژە بەوەشدەکات، بڕیاری بانکی ناوەندی بۆ پێدانی مانگانەی 100 هەزار دۆلار بە بازرگانانی بچووک و مامناوەند کاریگەریی ئەرێنیی لەسەر بەرزبوونەوەی بەهای دینار دەبێت، ئەگەر بچێتە بواری جێبەجێکردنەوە، بەڵام ئەمە پڕۆسەیەکی درێژخایەنە و هەنگاو بە هەنگاو بەهای دینار بەرامبەر بە دۆلار بەرزدەکاتەوە.
هۆکاری ئەمدواییەی دابەزینی بەهای دینار دەگەڕێتەوە بۆ بڕیارێکی ئەمریکا کە 19ـی مانگی رابردوو مامەڵەکردن بە دۆلاری لە 14 بانکی عێراقی قەدەخە کرد و بەوە تۆمەتباری کردن، کە دۆلاریان بۆ ئەو وڵاتانە ناردووە سزای ئەمریکایان لەسەرە.
لە دوای بڕیارەکەی بانکی ناوەندیی ئەمریکاوە، فرۆشی نەختینەی دۆلار لە بانکی ناوەندیی عێراق کە کاریگەری لەسەر بەهای دینار لە نێوخۆدا هەیە، بۆ نزیکەی نیوە بەراورد پێش بڕیارەکە کەمیکردووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ