ئۆپێک رۆژانە بەرهەمهێنانی 2.2 ملیۆن بەرمیل نەوت کەمدەکاتەوە

01-12-2023
بەشدار موزەفەر @bashdarmu
A+ A-

رووداو دیجیتاڵ

سکرتارییەتی ئۆپێک رایگەیاند، چەند وڵاتێکی ئەندامی هاوپەیمانێتییەکە رێککەتوون لەسەر ئەوەی بەشێوەیەکی خۆبەخشانە رۆژانە 2.2 ملیۆن بەرمیل نەوت لە ئاستی بەرهەمهێنان کەمبکەنەوە و تەنیا سعودیە رۆژانە یەک ملیۆن بەرمیل نەوتی کەمکردووەتەوە.
 
رۆژی پێنجشەممە، 30ـی تشرینی دووەمی 2023، وڵاتانی ئەندام لە هاوپەیمانێتیی ئۆپێک پڵەس کۆبوونەوەیەکی ئۆنلاینیان کرد و تێیدا کەمکردنەوەی بەرهەمهێنانی یەک ملیۆن بەرمیل نەوتی رۆژانەیان راگەیاند و ئاماژەیان بەوەشکرد، لە کانوونی دووەمی ئەم ساڵدا بەرازیل دەبێتە ئەندامی هاوپەیمانێتییەکە.
 
سعودیە، کە گەورەترین هەناردەکاری نەوتی خاوە، سەرۆکایەتیی ئەو هەوڵە بۆ کەمکردنەوەی بەرهەمهێنانی نەوت دەکات و بڕیاری داوە بەرهەمهێنانی رۆژانەی یەک ملیۆن بەرمیل کەمبکاتەوە.
 
بە کەمکرنەوەی بەرهە‌مهێنانی رۆژانەی یەک ملیۆن بەرمیل لە رۆژێکدا، سعودیە تاوەکو ئاداری 2024 رۆژانە تەنیا 9 ملیۆن بەرمیل نەوت بەرهەم دەهێنێت. 
 
جگە لە سعودیە، رووسیا رۆژانە 500 هەزار بەرمیل، عێراق رۆژانە 223 هەزار بەرمیل، ئیمارات 163 هەزار، کوێت 135 هەزار، کازاخستان 82 هەزار، جەزائیر 51 هەزار و عومان 42 هەزار بەرمیل نەوتی رۆژانەیان کەمکردووەتەوە. 
 
ئۆپێک پڵەس لە 23 ئەندام پێکدێت؛ 13یان ئەندامی رێکخراوی وڵاتانی هەناردەکاری نەوت (ئۆپێک)ـن و 10یەکەی دیکەیان لە دەرەوەی رێکخراوەکەن. هەریەک لە سعودیە و رووسیاش سەرکردە و بڕیاردەری دیفاکتۆی گرووپەکەن.
 
لە تشرینی یەکەمی 2022ـش، بۆ بەرزکردنەوەی نرخی نەوت، ئۆپێک پڵەس بڕیاری دا رۆژانە دوو ملیۆن بەرمیل بەرهەمهێنانی نەوت کەمبکاتەوە.

 

 

کۆمێنتەکان

وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه‌

کۆمێنتێک دابنێ

داواکراوە
داواکراوە