لەکاتی داخستنی بازاڕدا بەهای دینار بەرزبووەوە

رەوەز میرزا، ئاڵوگۆڕکاری دراو لە بازاڕی دۆلارەکەی سلێمانی بە رووداوی گوت، لە سلێمانی ئەمڕۆ لەکاتی داخستندا 100 دۆلار بە 145 هەزار و 500 دینار مامەڵەی پێوەکراوە. بەیانیی ئەمڕۆ لەکاتی کردنەوەدا 100 دۆلار بە 146 هەزار و 250 دینار بووە.

 

رەوەز میرزا دەڵێت، زۆریی و خێرایی حەواڵە هۆکاری سەرەکیی بەرزبوونەوەی بەهای دینارە.

 

بۆ حەواڵەکردن بازرگانان دەبێت دینار بخەنە سەر هەژمارەکانیان، ئەوەش وا دەکات دینار لە بازاڕ کەمببێتەوە و خستنەڕووی دۆلار زیاد دەبێت و خواست لەسەری کەمببێتەوە.

 

ئەو ئاڵوگۆڕکارەی دراو دەڵێت، ئەگەر حکومەت و بانکی ناوەندیی عێراقیش بیانەوێت، دەتوانن لە رێگەی زیادکردنی خستنەڕووی دۆلارەوە نرخی دینار بەرزتر بکەنەوە. ئەوکات ئەگەر هەیە 100 دۆلار بۆ ئاستەکانی 144 بۆ 145 هەزار دینار و کەمتریش دابەزێت.

 

بەڵام لە هەولێر بەهای دینار کەمتر بەرزبووەتەوە. لەکاتی کردنەوەدا 100 دۆلار بە 146 هەزار دینار و، لەکاتی داخستنیشدا بە 145 هەزار و 700 دینار بووە.

 

بەم پێیە، ئەمڕۆ لە سلێمانی لە نێوان کاتی کردنەوە و داخستندا، 100 دۆلار 750 دینار دابەزیوە، بەڵام لە هەولێر 300 دینار دابەزیوە.

 

حاجی سابیر باواجی، ئەندامی ئەنجوومەنی گۆڕینەوەی دراوی هەولێر بە رووداوی گوت، ئەو جیاوازییە ئاساییە و هەندێکجار روودەدات. هۆکارەکەشی تەنیا بابەتی خواست و خستنەڕووە.

 

ئەمڕۆ بەهۆی رۆژی کرێکارانەوە لە عێراق پشووی فەرمی بووە. بانکی ناوەندی هیچ دۆلارێکی نەخستووەتەڕوو، بەڵام بازاڕەکانی ئاڵوگۆڕی دراو کراوە بوون.