Sed sal di ser şerê yekem ê cîhanî re derbas bû
Vertou (Rûdaw) - Di 11ê Mijdarê de, sed sal di ser dawîbûna şerê yekem yê cîhanê re derbas dibin, di wê demê de, şerekî giran li bakurê Fransa di navbera Almanya û Fransa de çêbû û hejmareke zêde ya goristan û momêntan bo wan leşkeran hatin çêkirin ku wî şerî de hatin kuştin.
Berî sed salan cihê ku goristana serbazên Almanyayê ye li rojhilatê Fransayê, qada şerê herî dirêj û xwînavî yê di navbera Fransa û Almanyayê de bû.
Li herêma derdorên Vertou ya Fransayê li her çend sed metreyekê, goristanek, monumêntek yan jî peykerek ji bo bîranîna qurbaniyên şer û serbazên hatine kuştin û laşên wan winda ne, têne dîtin.
Herwiha goristanek heye ku ji bo bîranîna 4 hezar û 540 serbazên Almanî yên ku hatine kuştin û bê gor in, hatiye çêkirin.
Li goristana herî mezin a qurbaniyên herî zêde ya şerê herî dirêj ê di navbera dijminên kevn û dostên niha de, dêrek heye û têde dua û lava tê kirin.
Goristan cihê serdana welatiyan e, lê kesên ku dîrokê dizanin, baştir fêm dikin û zêdetir ditirsin ku şerê cîhanî yê sêyem rûbide.
Welatiyekî xort dibêje: “Ez hêvî dikim şer çênebe û ez wisa dibînim ku çênabe, ji ber ku gotinek heye dibêje nizanim bi kîjan çekan şerê sêyem ê cîhanî dest pê bike, lê şerê çarem ê cîhanî bi dar û keviran dibe. Hûn dizanin şerê yekem û duyem çi bi serê cîhanê de anî, çi bi ser xelkê de anî. Bi van çekên ku niha jî hene, bandora wî dê gelek mezintir be.”
Li goristanê ku xwîn û av tevlihevbûne û gul û giya kesk kiriye, serbaz û çek hene lê vê carê ne ji bo şer, ji bo bîranîna sedsala bidawîhatina şerê cîhanî yê yekem e.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse