Hewlêr (Rûdaw) – Li rojavayê Helebê şerê di navbera Heyeta Tehrîr El Şam (HTŞ) û hêzên hikûmeta Sûriyeyê de dijwar bûye û kontrola çend gund û bajarokan ket di destê Heyet Tehrîr El Şamê de.
Rewşa aloz û milmilaniyê li gundewarê rojavayê Helebê ji sibeha 27ê Çiriya Paşîn a 2024an ve berdewam dike.
Li gorî zanyariyên Rûdawê ji çavkaniyên xwecihî wergirtine, dengê top û lêdanan ji dûrahiya kêmtirî 10 kîlometreyan, li taxên rojavayê Helebê tên bihîstin.
Tirsa xelkê ji wê yekê heye ku aloziya salên 2012 heta 2016yan li wî bajarê dîsa rû bide û ew di navbera hêzên hikûmeta Sûriyeyê û grûpên çekdar de bibin qurbaniyên wan rûbirûbûnên çekdarî.
“Komên çekdar şer ragihand”
Çalakvanê ji gundewarê rojavayê Helebê Mutaz Nasir got:
“Odeya Operasyonên (El Feth El Mubîn) ku Heyeta Tehrîr El Şam û Ehrar El Şam, û Ceyş El Izze û hinek ji grûpan li xwe digire, şerek ragihand.
Wan navê wî şerê kireye Ragirtina Şerangêziyê. Di vî şerî de, hinek gund û bajarokên li rojavayê Helebê, hatin rizgarkirin.”
Tehrîr El Şam hinek gund kontrol kirin
Bi gotina Mutaz Nasir kontrola gundên Eyn Care, Acil, Iwêcil, Qubtan Cebel, El Hotê, Orim El Suxra û Orim El Kubra ketine di destê Heyet Tehrîr El Şamê de.
Li gorî zanyariyên Rûdawê, ji berî 2 mehan ve, amadekarî ji vê êrîşê re tê kirin.
Hat zanîn ku komên çekdar li herêmên gundewarê rojavayê Helebê û rojhilatê Îdlibê, hinek pêşketinên meydanî bi dest xistine lê li hemberî wan jî firokeyên Rûsyayê û topxaneya artêşa Sûriyeyê hewla şikenandina wê êrişê didin
“Rejîmê xelk koçber kir”
Mutaz Nasir her wiha got:
"Piştî ku rejîma Sûriyeyê, di çend operasyonên leşkerî de, li pey hev ku ji sala 2018yan ve heta 2020an berdewam bûn, ev herêm kontrol kirin, bi hevkarî ligel milîsên Îranî, xelkên van navçeyan koçber kirin.
Em behsa pêleke hilkirina niştecîbûnê dikin ku sala 2019 - 2020an hate texmînkirin, nêzîkî milyonek kesan bûn.
Beşek ji wan li Ewropa yan li Tirkiyeyê bûne penaber, yan jî neçar bûn, li hundir koçberî navçeyên nêzîk bibin, wekî Îdlib û Efrînê."
97 kes hatin kuştin
Rewangeha Sûriyeyê ya Mafên Mirovan jî ragihand ku di 24 demjimêrên borî de, heta sibeha îro, 97 kes hatine kuştin.
Ji wan 44 çekdarên Heyeta Tehrîr el-Şam, 16 çekdarên hêza bi navê “Artêşa Niştimanî ya Sûriyeyê” ya ser bi Tirkiyeyê ve û 37 leşkerên hêzên artêşa Sûriyeyê ne.
🛑Heyeta Tehrîr El Şamê li Helebê êrişî hêzên Hikûmeta Sûriyeyê kir
— RudawKurdi (@RudawKurdi) November 28, 2024
🛑Kontrola çend gund û bajarokan ket destê çekdarên Heyeta Tehrîr El Şamê
Xalid Cemîl Mihemed şerê li Helebê dinirxîne pic.twitter.com/xHo08MbYC8
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse