Hewlêr (Rûdaw) - Wezîrê Karên Derve yê Sûriyeyê Feysel Miqdad got, ji bo ku pêwendî asayî bibin divê Tirkiye ji axa Îraq û Sûriyeyê vekişe.
Tirkiye di van demên dawî de ji bo pêwendiyên xwe bi Sûriyeyê re asayî bike dîplomasiyeke tund dimeşîne.
Serokkomarê Tirkiyeyê Recep Erdogan jî ji bo asayîkirina pêwendiyan gelek caran xwestibû ku bi Serokê Sûriyeyê Beşar Esed re bicive.
Li aliyê din, Sûriyeyê jî ji bo ku pêwendiyên navbera her du welatan asayî bibin wekî merc gotibû divê Tirkiye ji Sûriyeyê vekişe.
Ji ber vê yekê Beşar Esed van xwestekên Erdogan red dike.
Wezîrê Karên Derve yê Sûriyeyê Feysel Miqdad ji Russia Todayê re pêwendiyên Tirkiye û Sûriyeyê nirxandin.
Serokkomarê Tirkiyeyê Recep Tayyîp Erdogan derbarê pêwendiyên Tirkiye - Sûriyeyê û li hemberî Îsraîlê pêşniyara avakirina ekseneke ku ji Tirkiye, Sûriye û Misirê pêk tê kiribû.
Li ser gotinên Erdogan, Wezîrê Karên Derve yê Sûriyeyê Feysel Miqdad wiha got:
"Hêvîdar im ku daxuyaniyên Serokomarê Tirkiyeyê yên derbarê avakirina navendeke hevgirtinê ya Sûriye-Misir-Tirkiyeyê ji bo rûbirûbûna gefan pêk were û ev yek bibe xwestekeke ji dil û rast a Tirkan."
"Divê Tirkiye ji axa Îraq û Sûriyeyê vekişe"
Feysel Miqdad ji bo asayîkirina pêwendiyên Tirkiye-Sûriyeyê jî wiha anî ziman:
"Eger Tirkiye dixwaze di hevkariya bi Sûriyeyê re de gavên nû bibîne û pêwendiyan asayî bike, divê ji axa bakurê Sûriyeyê û rojavayê Îraqê ya Ereban ku dagir kiriye vekişe.”
Her wiha Miqdad diyar kir ku Tirkiye li bakurê welatê wan bi berdewamî leşkerên xwe bi cîh dike û ji bo serdestiya xwe zêde bike hewl dide kampan ava bike.
Wezîrê Karên Derve yê Sûriyeyê tekez kir ku rêvebiriya Şamê ji Tirkiyeyê xwestiye ku ji van polîtîkayan paşde gav biavêje û bi temamî dev ji van polîtîkayan berde.
Miqdad diyar kir ku Sûriye her tim xwe bi pêşerojê ve girê nade lê ew li îro û pêşerojê dinêre.
Herwiha Miqdar got ku ew hêvî dikin ku rêvebiriya Tirkiyeyê ji gotinên xwe samîmî bin û wiha pê de çû:
"Ji bo pêkanîna hevkariyeke wiha divê şert û mercên pêwîst bên bicihanîn, wate divê Tirkiye ji axa Îraq û Sûriyeyê vekişe."
Hakan Fîdan hat protestokirin
Tirkiye piştî 13 salan beşdarî Lûtkeya Yekîtiya Ereban a li Qahîreya paytexta Misirê bû.
Di rûniştina 162yemîn civîna Wezîrên Karên Derve ya Yekîtiya Ereban de dema ku navê Wezîrê Karên Derve yê Tirkiyeyê Hakan Fîdan ji bo axaftinê hat anonskirin şandeya Sûriyeyê ew protsto kir û ji salona civînê derket.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse