Hewlêr (Rûdaw) - Endamekî Encûmena Şarezayên Rêberî û nûnerê berê yê Rêberê Komara Îslamî ya Îranê yê Sîstan û Belûçistanê hat kuştin.
Endamê Encûmena Şarezayên Rêberî û nûnerê berê yê Rêberê Komara Îslamî ya Îranê yê Sîstan û Belûçistanê Ebaselî Suleymanî îro Çarşemê 26ê Nîsana 2023an li bajarê Babulser ê parêzgeha Mazenderan a bakurê Îranê di nava bankekê de bi çek hat kuştin.
Medyaya Îranê ragihand, kujer bi çeka pasewwanê bankê Ebaselî Suleymanî kuştiye û 3 kesên din jî birîndar kirine.
Cîgirê Parêzgarê Mazenderanê ji bo Karûbarên Siyasî û Ewlehî Ruhullah Selegî ragihand, kujer ji aliyê hêzên ewlehiyê ve hatiye desteserkirin.
Pileya olî ya Ebaselî Suleymanî Ayetullah bû ku berê pêşnimêjê Zahîdanê û nûnerê rêberê Komara Îslamî ya Îranê yê parêzgeha Sîstan û Belûçistanê bû. Ew her wiha endamê Endamê Encûmena Şarezayên Rêberî yê Îranê ye ku encûmeneke taybet e ji bo destnîşankirin û dûrxistina rêberê Komara Îslamî ye.
Sedema gulebarana Ebaselî Suleymanî heta niha ne diyar e û berpirsên parêzgeha Mazenderanê jî ragihandine ku piştî lêkolîna li ser kujer dê zanyariyên zêdetir bidin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse