Îro li kampa Dareşekran a li Hewlêrê, di encama teqîna sobeyekê de agir bi mala koçberekî Rojavayê Kurdistanê ket.
Hewlêr (Rûdaw) – Îro li Kampa Dareşekran a koçberên Rojavayê Kurdistanê ku li sînorê parêzgeha Hewlêrê ye, sobeyeke gaze teqiya û di encamê de pênc kesên ji malbatekê bi giranî birîndar bûne û beşek ji laşê wan şewitiye.
Berdevkê Berevaniya Şaristaniya Hewlêrê, Raîd Serkew Kareş ji Rûdawê re ragihand, “bûyer îro yekşembiyê di demjimêr 09:50 de li maleke Kampa Dareşekranê û ji ber teqîna sobeyeke gazê çê bûye û di bûyerê de pênc kesên ji malbatekê birîndar bûne, ku du jê zarok û sê kes jî jin in.”
Derbarê sedema bûyerê de jî, Serkewt Kareş got: “Sobeya ku îro li vê malê teqiyaye, hem bi gazê û hem jî bi elektrîkê dixebite, pêştir ji ber ku kun bûye gaz jê çûye û dema ku elektrîk hatiye, agir pê ketiye û teqiyaye.”
Li gor agahiyan, di bûyerê de Qumrî Mihemed a 61 salî, Xoxe Îbrahîm a 37 salî tevî sê zarokên temen 16, 14 û 10 salî birîndar bûne.
Berdevkê Polîsê Berevaniya Şaristaniya Hewlêrê da xuyakirin, ku rewşa tendirustiya birîndaran baş e û niha li Nexweşxaneya Emergency a Hewlêrê tên dermankirin.
Her îro li rojavayê bajarê Bexda ya paytexta Iraqê, bi sedema kontakta elektrîkê li malekê şewat derket û di encamê de tevahiya endamên wê malbatê ku pênc kes bûn, di şewatê de canê xwe ji dest dan.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse