Hewlêr (Rûdaw) - Li bajarê Rihayê yê Bakurê Kurdistanê, bi beşdariya akademîsyenên ji 64 welatan cara ewil dê Kongreya Neolîtîk a Cîhanî bê lidarxistin.
Bajarê Rihayê bi hebûna bi dehan şûnwarên dîrokî yên serdema neolîtîk û “Projeya Girên Kevir” bala cîhana zanistê dikişîne.
Li wî bajarê Kurdistanê di navbera 4 û 8ê Çiriya Paşîna 2024an de bi beşdariya akademîsyenên ji 64 welatên cihê li ser asta cîhanê cara yekem dê Kongreya Neolîtîk a Cîhanî bê lidarxistin.
“Nûnerên 480 saziyan dê beşdar bibin”
Serpereştyarê Projeya Girên Kevir Necmî Karul got:
“Ji bo me sazkirina kongreyeke wiha li Rihayê gelekî bi wate ye.
Ji ber ku ev kongreyeke şûnwarnasiya spesîfîk e û dê pisporên neolîtîkê bêne ba hev.
Nûnerên 480 saziyan dê li vê derê amade bin."
Di Kongreya Neolîtîk a Cîhanê de, dê bi dehan gotarên zanistî bêne pêşkêşkirin û hemû berhemên serdema neolîtîk ku çaxa dawî ya Serdema Kevir e bêne nirxandin.
Necmî Karul her wiha got:
“Zanîngeha Stenbolê û Zanîngeha Heranê bi hevbeşî vê kongreya akademîk saz dikin.
Di vê kongreyê de dê neolîtîkên cuda yên li parzemîn û erdnîgariyên cuda yên li cîhanê bêne axattin.”
Bajarê Rihayê yê Bakurê Kurdistanê, bi şûnwarên dîrokî bala miroveyetiyê dikişîne û salane bi sed hezaran geştyar Girê Miraza, Qûça Keçel, Girê Çeqmeq, Girê Sayburcê, Girê Darikê, Kepira Yogunburcê û şûnwarên din ên dîrokî ziyaret dikin.
Li gorî amarên fermî, di 7 mehên destpêkê yên sala 2024an de 326 hezar geştyar çûne serdana şûnwarê dîrokî Girê Miraza.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse