Piştî êrîşa li ser gundê Kurdan Pêşmerge ber bi Kerkûkê ve çûn
Hewlêr (Rûdaw) – Piştî ku Erebên hawirde roja Înê li gundê Pelkane yê Kerkûkê êrîşî Kurdan kirin Hêza Pêşmerge ber bi herêmê ve birê ket.
Roja Înê 21ê Nîsana 2023an li gundê Pelkane yê ser bi nahyeya Sergeran a Kerkûkê, di navbera komek Erebên hawirde û cotkarên Kurd de şer derketibû û di encamê de 10 kes birîndar bibûn.
Piştî bûyeran roja Înê îro Hêza Pêşmerge ber bi herêmê ve birê ket.
Fermandarê Eniya 5 a Pêşmerge li Rojavayê Kerkûkê Nûrî Heme Elî ji Rûdawê re ragihand, Hêza Pêşmerge ji bo parastina welatiyên ku li herêmê rastî zilm û zordariyê tên, hatine bicihkirin.
Fermandarê Pêşmerge diyar kir ku ji bo kêmkirina aloziyên li navçeyê û dabînkirina ewlehiyê ew bi hêzên ewlehiyê yên Iraqê re di hemahengiyê de ne.
Li aliyê din Erebên hawirde yên ku piştî bûyerên duh bi komeke qelebalix hatibûn Sergeranê rastî mudaxeleya hêzên ewlehiyê hatin.
Cîgirê Qeymeqamê Sergeranê Ebdulmuttalib Necmeddîn ji Rûdawê re ragihand, “Dema êvarê di navbera ciwanên Kurd û Ereban li sûkê gengeşeyeke devkî çêbû. Piştre Ereb bi komeke mezin vegeriyan lê polîs û leşkeran rê li ber pevçûnan girtin.”
Gundê Pelkaneyê dikeve rojavayê Kerkûkê û ser bi nahyeya Sergeranê ye ku ji bûyerên 16ê Cotmeha 2017an ve Erebên hawirde, hewl didin dest deynin ser zeviyên cotkarên Kurd.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse