Hewlêr (Rûdaw) - Siyasetmedar û akademîsyen Ufuk Uras diyar kir ku ew ji pêvajoya ku bi banga Serokê MHPyê Devlet Bahçelî dest pê kir bi hêvî ye û piştî banga Ocalan her çi pêk were girîng e.
Pêvajoya ku di Çiriya Pêşîn a 2024an bi daxuyaniya Serokê Giştî yê MHPyê Devlet Bahçelî dest pê kiribû bi ziyareta heyeta DEM Partiyê ya Herêma Kurdistanê berdewam dike.
Heyeta Îmraliyê îro bi Serok Mesûd Barzanî re civiya û peyama Abdullah Ocalan gihand Serok Barzanî.
Heyet dê sibê bi Serokê Herêma Kurdistanê Nêçîrvan Barzanî re jî hevdîtinekê bike û roja sêşemê jî biçe Silêmaniyê û bi Serokê YNKyê Bafil Talebanî û Cîgirê Serokwezîr Qubad Talebanî re bicive.
Di heyetê de Pervîn Buldan û Sirri Sureyya Onder, Hevserokê DBPyê Keskîn Bayindir, endamên Buroya Hiqûqê ya Sedsalê Ozgur Erol û Îbrahîm Bilmez, Hevberdevkê Komîsyona Pêwendiyên Derve ya DEM Partiyê Berdan Ozturk û parlamenterên DEM Partiyê Gulcan Kaçmaz Sayyîgît û Mehmet Kamaç cih digirin.
Pervîn Buldanê derbarê serdanê ji Rûdawê re gotibû ku ew dê di hevdîtina xwe ya bi Abdullah Ocalan re peyamên rayedarên Herêma Kurdistanê ragihînin.
Tê payîn heyeta DEM Partiyê piştî vegera Hewlêrê dê careke din biçe Îmraliyê û Abdullah Ocalan jî ji bo çareseriya Pirsgirêka Kurd bangekê li PKKyê bike.
Siyasetmedar û akademîsyen Ufuk Uras bû mêvanê Bultena Bakur a Rûdawê û li ser pêşhatên pêvajoyê bersiv da pêşkeşkara Rûdawê Hêvîdar Zanayê.
"Piştî daxuyaniya Ocalan çi pêk were girîng e"
Akademîsyen Ufuk Ursa behsa daxuyaniyên aliyan kir û got:
“Daxuyaniyên PKK, daxuyaniyên Ocalan, daxuyaniyên Koma DEM Partiyê gelekî erênî ne.
Li gorî dîtina min ew tişta ku piştî daxuyaniya Abdullah Ocalan pêk were girîng e.
Ez bawer nakim ku di vê pêvajoyê de ti pirsgirêk derkevin lê ji niha û pê de divê em giraniyê bidin avakirina aştî û demokrasiyê.”
Li gorî gotina Ufuk Uras Rojavayê Kurdistanê jî beşeke ji pêvajoya çareseriyê û diyar kir ku girîng e Kurd li Sûriyeyê bibin beşekî hikûmeta navendî.
Siyasetmedar Ufuk Uras behsa Rojavayê Kurdistanê jî kir û wiha domannd:
“Girîng e hêzên Kurdî li Sûriyeyê di avakirina Sûriyeyê de bibin beşekî hikûmeta navendî.
Dibe ku perspektîfeke wisa hebe lê ez difikirim ku mijara herî girîng yekîtî û hevgirtina Kurdan a di nava xwe de ye. Biratiya Kurdan û Tirkan jî gelekî girîng e.
Dema em li hevpeyvîna Ehmed Şer a di kovara Ekonomistê dinêrin em pirrengiya demokratîk jî tê de heye.
Yanî ji xwe îhtimalek e ku Kurd jî bibin beşek ji hikûmeta navendî ya Sûriyeyê lê ev model ji modela federatîf gelekî populertir e.
Ev hemû mijar in ku divê bên nîqaşkirin lê çawa ku xetên sor di têkiliyên Tirkiye-Îraqê de ji holê rabûn û ew jî bûn xetên pembe.”
Akademîsyen Ufuk Uras da zanîn ku modela Îraq û Herêma Kurdistanê modeleke serekî ya vê pêvajoya çareseriyê ye.
“Ocalan girîngiyê dide rola CHPyê”
Ufuk Uras ragihand ku Abdullah Ocalan girîngiyeke mezin dide rola CHPyê û wiha got:
"Beriya niha ji CHPyê re hatibû ragihandin û CHPyê perspektîfek pêşkêş kiriye ku pêwîste CHP jî di vê pêvajoyê de cih bigire.
Tişta ku em jê re dibêjin normalîzekirin, derbasbûna ji rejîma 12ê Îlonê ye.
Di vê mijarê de ji CHPyê re ti pirsgirêk dernakeve.
Yanî biratiya Tirkan - Kurdan ne tenê bi awayekî ye, ev avakirina paşeroj û dîrokeke bi hev re ye.
Avakirina tifaqeke dîrokî ye. Ji ber vê yekê niha bêdengiyek heye.
Reaksîyon nîne lê gumana min tune ew kesên ku di vê navberê de radiwestin dê zû bibin beşekî vê pêvajoyê."
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse