Wêne: AA
Hewlêr (Rûdaw) - Cenazeyên 3 zarokên Kurd ku di çemê Kizilirmakê de li Sêwasê xeniqîbûn ji çem hatin derxistin û li Rihayê bi axê hatin spartin.
Herdu birayên bi navên Mahmut û Kadîr Yagmur û Mehmet Zurnaci ku ji bo karê çandina petatan çûbûne Sêwasê, duh, 11.06.2020, ji bo ku xwe hênik bikin li gundê Kizilkavraz ketibûn çemê Kizilirmakê, lêbelê nekarîbûn ji avê derkevin û her sê zarok di avê de winda bûbûn.
Piştî çendekê ji lêkolîn û lêgerîna tîmên hawarçûnê, cenazeyên her sê zarokên Kurd hatibûn dîtin û cenazeyên wan zarokan ji bo bajarê wan, Rihayê hatibûn veguhastin.
Termên herdu birayan, Mahmutê 12 salî û Kadîrê 10ê salî, piştî nimija li mizgefta taxa Kirmizipinar, li goristina navçeya Hewengê (Bozova) a ser bi Rihayê ve bi axê hatin spartin.
Muxtarê taxa Kirmizipinar li Hewengê ji rojnamevanan re ragihand ku ew ji ber vê bûyerê gelek xemgînin û amaje bi wê kir, rewşa aborî ya malbatên wan zarokan xerab e û wan her sê zarokan jî ji bo dabînkirina pêdawîstiyên xwe yên dibistanê berê xwe dabûn wî karî.
Cenazeyê Mehmet Zurnaci ê 8 salî jî piştî nimêja li mizgefta gundê Yaylak ser bi Hewengê ve, li goristana gund bi axê hat spartin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse