Rûdaw
Pirdê (Rûdaw) – Hêzên Iraqî hefteyek e zextê li mixtarên bajarokê Pirdê yê ser bi Kerkûkê dikin û bi rêya formekê ji wan daxwaz kirine ku zanyariyên bi hûrgilî li ser xelkê wê deverê bidin.
Beşek ji wan mixtaran formên ku hatine xwestin tijî kirine û beşeke din red kiriye û weke armanceke siyasî dibînin û dibêjin "polîsê federalî bi vê rêyê dixwazin hejmar û karmendên asayiş û pêşmergeyên vê deverê bi dest bixin".
Mixtar Şehîd Aram ji Tora Medyayî ya Rûdawê re ragihand: “Li paş vî karî armancên siyasî hene, di wê formê de divê wêneya serokê malbatê li ser hebe û nav û hejmara telefonê têde hebin, divê ew kes amadeyî hemû lêpirsînan be û li ser mêvanên ku serdana wî dikin jî zanyarî bide.”
Tijîkirina wê formê tenê taxên Kurdan li xwe digre, îdare û polîsê Pirdê ji belavkirina wê formê agahdar nînin û ji hêzên Iraqî re pêşniyar kirine ku dest ji tijîkirina wê formê berdin, ku tirsê li cem niştecihên wan taxan çêdike.
Rêveberê Bajarokê Pirdê Ebdulmutelîb dibêje: “Ew formên zanyariyê yên li cem me hene, em amade ne ku bidin wan, ji ber ku me berî niha zanyarî berhev kirine û li cem me amar hene ku heman zanyariyên ku mixtaran berhev kirine, tenê dest ji wê formê berdin, em amade ne ku weke îdareya Pirdê bidin wan.”
Beşek ji mixtar û niştecihên çend taxên Pirdê, daxwaza xwe arasteyî Encûmena Parêzgehê û partiyên Kurdistanî kirine ku hewla betalkirina wê formê bidin û rê li ber tijîkirinê bigrin.
Bi rêya Encûmena Nûneran a Iraqê ve hewla betalkirina wê formê hat dayîn, lê hêj hêzên Iraqî li ser tijîkirina wê rijd in û vê hefteyê sê caran li gel mixtaran civiyane û zanyarî xwestine.
Endama Encûmena Nûneran a Iraqê Dîlan Xefûr dibêje: “Em li pey vê pirsgirêkê çûn û me li gel hêzên Iraqî li hev kir, divê ew form neyên tijîkirin û em daxwazê dikin ku xelk formê tijî nekin, ji ber ku wergirtina zanyariyan karê wan hêzan nîne û armanceke wan a din heye.”
Piraniya niştecihên Pirdê, Kurd in. Lê ji ber şerê DAIŞê hejmareke mezin ji awareyan li wir niştecih bûne, lê dabeşkirina formên zanyariyê tenê taxên Kurdan li xwe girtiye.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse