گەنجێک لە رۆستۆڤ لە بەردەم ئۆتۆمبێلێکی سەربازیی ڤاگنەر ئاڵای رووسیای هەڵگرتووە. وێنە: AFP
رووداو دیجیتاڵ
ترس و دڵەڕاوکێ نەما و جۆرێک لە سەقامگیری رووی لە مۆسکۆ کردەوە. یەڤگینی پریگۆژین، سەرۆکی گرووپی ڤاگنەر رایگەیاند، پێشڕەوی هێزەکانیان بە ئاراستی پایتەختی رووسیا وەستاندووە و دەگەڕێنەوە بنکە سەربازییەکانیان.
پریگۆژین دەڵێت، "دۆخەکە گەیشتە ئەوەی لەوانەیە خوێن بڕژێت، بۆیە بە لەبەرچاوگرتنی بەرپرسیارێتی رژانی خوێنی رووسەکان لە یەکێک لە بەرەکان، هێزەکانمان دەکشێنینەوە و دەگەڕێینەوە کامپی گۆڕەپانەکان بەگوێرەی ئەوەی لە پلاندا هەیە."
گرووپی ڤاگنەر تەنیا 200 کیلۆمەتر لە مۆسکۆ دوور بوون، هەڕەشەی دەستگیرکردنی وەزیری بەرگری و سوپاسالاریان دەکرد کە پریگۆژین تۆمەتباری کردوون بە هۆکاری کوژرانی هەزاران چەکداریان لەشەڕی ئۆکراینا.
ئێستا دۆخی مۆسکۆ ئاسایی بووەتەوە و خەڵك گەڕاونەتەوە سەر کارەکانیان.
سێرگی، دانیشتووی مۆسکۆیە و دەڵێت، "وامدەزانی دۆخەکە بەگشتی مەترسیدار دەبێت و شتێک روودەدات، بەڵام خۆشبەختانە هەر بۆچوونێک بوو."
ئۆلگا شمیدت، دانیشتوویەکی دیکەی مۆسکۆیە و باس لەوە دەکات، "بۆم روونبوو کە سوپاکەمان دەتوانێت بیوەستێنێت. ئەمەش حەزی خۆی بوو. کاتێک خەڵكێکی زۆرت لەبەردەستن، هەست بە هێز و دەسەڵات دەکەی، لەوانەیە لەبەر ئەمە وایکردبێت."
گرووپی ڤاگنەر شاری رۆستۆڤی کۆنتڕۆڵکردبوو، دەیویست لە رێگەی ئێم4 بگاتە مۆسکۆ، بەڵام رووسیا و ڤاگنەر رێککەوتن. بە گوتەی یەڤگینی پریگۆژین، رووسیا ویستوویەتی ڤاگنەر هەڵوەشێنێتەوە بۆیە 'رێپێوانی دادپەروەریان' کردووە.
ئەلێکسەندەر لوکاشینکۆ، سەرۆکی بێلارووس لە دوا خولەکەکاندا وەڵامی چاکەکانی پووتینی دۆستی دایەوە و گرووپی ڤاگنەری رازیکرد بکشێنەوە، لەبەرامبەردا گەرەنتی سەلامەتییان دەکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ