ترەمپ: من باوکی پیتاندنی منداڵم

 

ترەمپ گوتی، "ئێمە پارتی پاڵپشتیکردنین لە پیتانی منداڵ. ئێمە لەگەڵ پیتاندنین بە هەموو شێوەیەک. دیموکراتەکان هەوڵیان دا بۆ ئەمە هێرشمان بکەنە سەر، بەڵام زیاتر لەوان پاڵپشتی ئەمە دەکەین." 

 

ترەمپ چەند جارێک گوتویەتی، ئەگەر ببێتەوە سەرۆک، ئەوا حکومەت یان کۆمپانیاکانی دڵنیایی ناچاردەکات خەرجیی دانانی منداڵی بلووری - پیتاندنی منداڵ دابین بکەن. 

رکابەرەکەشی بە کۆتێکی رەشەوە لە ویلایەتی میشیگان وەڵامی دەداتەوە. 

 

کامالا هاریس، بەربژێری دیموکراتەکان رایگەیاند، "قسەکانی دۆناڵد ترەمپ زۆر نامۆ بوون کاتێک دەڵێت، "باوکی پیتاندنی منداڵە." ئەگەر دەیەوێت بەرپرسیارێتی هەڵبگرێت، ئەوا با لێپرسراویێتی بەرامبەر ئەو راستییە هەڵبگرێت کە سێیەکی ئەو ژنانەی بوونەتە قوربانی لەباربردنی منداڵ، لەو ویلایەتە کۆمارییەیە کە قەدەخەی کردووە." 

 

ترەمپ لەگەڵ سنووردارکردنی لەباربردنی منداڵە و چەند جارێکیش ئاماژەی بە قەدەخەکردنی کردووە، لە بەرامبەردا رکابەرەکەی دەیەوێت ئەو بابەتە لەلایەن دایکانەوە بڕیاری لێبدرێت نەوەک حکومەت. 

 

بەگوێرەی دوایین راپرسی هاوبەشی ئێپسۆس و رۆیتەرز، 49٪ی ژنانی ئەمریکا پاڵپشتی هاریس و 40٪یان پاڵپشتی ترەمپ دەکەن. 

 

لە شاری ئۆرلاندۆی ویلایەتی فلۆریدا کە زۆرینە کۆمارییە، ژمارەیەک رێکخراو دەیانەوێت دایک ئازاد بێت لە لەباربردنی منداڵەکەی و هەوڵمەتی کۆکردنەوەی پاڵپشتی و دەرگا بە دەرگایان دەستپێکردووە. 

 

ئەوان پێویستیان بە کۆکردنەوەی 900 هەزار واژۆیە بۆ ئەوەی 5ی تشرینی دووەمی ئەم ساڵ هەڵبژاردنی لەبارەوە بکرێت. 

 

مالکۆم رۆبێرتس، دانیشتووی شاری ئۆرلاندۆیە و دەڵێت، "بە دڵنیاییەوە دەنگ بە بەڵێ دەدەم، چونکە پێموایە پێویستە ژنان بتوانن بڕیار لەبارەی تەندروستییانەوە بدەن." 

 

بە گوێرەی دوایین راپرسی فۆکس نیوزی ئەمریکی کە 17ی تشرینی یەکەمی 2024 بڵاوکراوەتە، ترەمپ، بەربژێری کۆمارییەکان 50٪ و هاریس، بەربژێری کۆمارییەکان 48٪ی دەنگەکانی هەڵبژاردنی سەرۆکایەتیی ئەمریکا بەدەست دەهێنن.