لە لیتوانیا ئۆتۆمبێلی دلیڤەریی بێ شۆفێر تاقیدەکرێتەوە

 

 

تادۆس نۆرۆسەیتس، بەڕێوەبەری کۆمپانیای "لاستمایڵ" رایگەیاند، "ئۆتۆمبێلەکە بە تەواوی سەربەخۆیە، بۆ لایەنی ئەمنی ئێمە کەسێکمان لە ئۆفیس داناوە کە سوکان، پایدەر و سکرینی لەبەردەستە و لە دۆخی لەناکاودا ئۆتۆمبێلەکە کۆنترۆڵ دەکات."

 

خێرایی ئۆتۆمبێلەکە دەگاتە 25 کیلۆمەتر لە کاژێرێک و بە پشتبەستن بە کامێرا و رادار دەڕوات بەڕێوە.

 

ئۆتۆمبێلەکە لەلایەن کۆمپانیای "لاستمایڵ"ی لیتوانی و "کلیڤۆن"ی ئیستۆنییەوە بەرهەمهێندراوە. بەڕێوەبەری کۆمپانیای "لاستمایڵ" دەڵێت، "دەمانەوێت لە هەموو قەرەباڵخییەکدا تاقیبکەینەوە. بیرۆکەکە ئەوەیە ئەم ئۆتۆمبێلانە بخەینە نێوەڕاستی شار و ببینین کە پرۆسەکە چۆن دەڕوات."

 

ماوەی سێ مانگە ئۆتۆمبێلە بێ شۆفێرەکە تاقیدەکرێتەوە و 2000 کیلۆمەتری بە سەلامەتی بڕیوە. لەلایەن هاووڵاتییانەوە لە کۆی 5 نمرە، 4.8یان پێداوە. لە یەک دەرچووندا، دەتوانێت کەرەستە بۆ حەوت کەس بگەیێنێت.