رووداو دیجیتاڵ
یانەی بایرن میونشن بەشێوەیەکی شۆکهێنەر نازناوی خولی ئەڵمانیای بردەوە و بۆ وەرزی یازدەیەم لەسەریەک بووە پاڵەوانی خولی ئەڵمانیا.
لە دوایین گەڕی بوندێسلیگادا، بایرن میونشن بەرامبەر کۆلن یارییکرد و یارییەکەی بە زەحمەت لە یانەی خاوەن یاریگە بردەوە، لەولاشەوە دۆرتموند لە یاریگەی خۆیدا بەتامی دۆڕان یەکسانبوو و نازناوەکەی لەبەرژەوەندیی باڤارییەکاندا لەدەستدا.
بەر لەم گەڕە و کۆتاییهاتنی خولەکە، دۆرتموند بە جیاوازیی دوو خاڵ لە پێش بایرن میونشنەوە بوو، یانەکە پێویستیی بەبردنەوەی یارییەکە هەبوو بۆ ئەوەی نازناوەکە دوای یازدە ساڵ دوورکەوتنەوە بباتەوە، بەڵام بەشێوەیەکی چاوەڕواننەکراو و دوور لە هەموو پێشبینییەکان یانەکە لەنێو یاریگە و پاڵپشتیی هەزاران هاندەریدا بە 2-2 بەرامبەر ماینز دوو خاڵی لە یارییەکەدا لەدەستدا، بەمەش یانەکە نەیتوانی نازناوەکە لە بەرژەوەندی خۆی یەکلابکاتەوە.
لە خولەکی 15 ئاندریاس ئۆڵسن گۆڵێکی بۆ ماینز تۆمارکرد، پاشان سێباستیان هالەر لێدانێکی سزای بۆ دۆرتموند لەدەستدا، دوای ئەوە لە خولەکی 24 کەریم ئۆنیسۆ گۆڵی دووەمی بۆ ماینز تۆمارکرد و هاندەرانی دۆرتموندی بێهیواکرد.
لە نیوەی دووەمدا دۆرتموند گۆڵێکی لە رێگەی رافایێل گێرێرۆوە تۆمارکرد، بەڵام هیچی لە یارییەکە نەگۆڕی و خاوەن یاریگە هەلە گەورەکەی بۆ بردنەوەی نازناوی خولی ئەڵمانیا لەدەستدا.
بایرن میونشن بەهەمان ئەنجام لە کۆلنی بردەوە و بووە پاڵەوان، هۆکاری سەرەکیش دۆرتموند بوو، پاشانیش جەمال موسیالا بوو کە لە خولەکی 89 گۆڵی بردنەوەی تۆمارکرد و نازناوەکەی یەکلاکردەوە.
ئەمە یازدەیەم وەرزە لەسەریەک بایرن میونشن نازناوەکە دەباتەوە و بووە خاوەنی 33 نازناوی خولی ئەڵمانیا.
ئەمە یەکەم نازناوی بایرن میونشنە لەم وەرزەدا، لەکاتێکدا پێشتر نازناوی جامی ئەڵمانیای لەدەستداوە و لە چامپیۆنزلیگیش دوورخراوەتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ