شەڕی هاندەرانی پێشمەرگەی هەولێر و دهۆک
رووداو دیجیتاڵ
ئێوارەی ئەمڕۆ لەنێو یاریگەی شەهید فڕانسۆ هەریری یاریی کۆتایی جامی کوردستان لەنێوان یانەکانی پێشمەرگەی هەولێر و دهۆک بەڕێوەچوو؛ پێشمەرگەی هەولێر یارییەکەی بەئەنجامی دوو گۆڵ بەرامبەر بە گۆڵێک بردەوە، بەڵام لە شوێنی پیرۆزباییکردن و گێڕانی ئاهەنگی سەرکەوتن سەدان کەس کەوتنە گیانی یەکدی و گرژییەکی زۆر دروستبوو.
شەڕەکە هێندە گەورە بوو یەکێتیی تۆپی پێی کوردستان بەناچاری نەیتوانی خەڵات و جامی کوردستان دابەش بکات.
سیروان نەجمەدین، سکرتێری یەکێتیی تۆپی پێی کوردستان بە رووداوی رایگەیاند، "بەداخەوە بەم کەسانە ناڵێن هاندەر و ئەوانەی لە خولی عێراق دەدۆڕێن، ناوێرن بەمشێوەیە رەفتار بکەن، ئێمە کۆدەبینەوە و ئەوکات بڕیاری خۆمان دەدەین."
شەڕەکە هێندە گەورە بوو بەشێک لە هاندەرانی هەردوو یانە برینداربوون و بۆ نەخۆشخانەی فریاکەوتنی هەولێر گواسترانەوە، لەبەرئەوەی ئەوانەی شەڕیان دەکرد بە دار و بەرد رووبەڕووی یەکدی بوونەوە.
جەرجیس سادق، سەرۆکی دەستەی هاندەرانی یانەی هەولێر بە رووداوی راگەیاند، "دەیان هاندەرمان برینداربوون و گەیێندراونەتە نەخۆشخانە."
شکاندنی ژمارەیەکی زۆری کورسی و شێواندنی یاریگەکە لایەنێکی دیکەی ئاڵۆزی دوای یارییەکە بوو.
لای خۆیەوە، دیدار حامد، ئەندامی دەستەی کارگێڕی یانەی هەولێر دەڵێت، "زیانی گەورە بە کورسییەکان و یاریگەکەمان کەوتووە."
یاریی یانەکانی هەولێر و دهۆک بە کلاسیکۆی کوردستان ناسراوە، زۆرینەی کات گرژی و شەڕ لە نێوان هاندەرانی ئەو دوو یانەیەدا روودەدات، بەڵام ئەمجارە شەڕی هاندەرانی دهۆک لەگەڵ هاندەرانی یانەی پێشمەرگەی هەولێر هێندەی شەڕی کلاسیکۆی کوردستان گەورە بوو.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ