شوێنگرەوەی ئێمباپێ لە پرێمەرلیگە

 

 

ماوەی چەندین ساڵە هەواڵی رۆشتنی ئێمباپێ لە پاریس سانجێرمان و پەیوەندیکردنی بە یانەی ریال مەدریدەوە میدیاکانی بەخۆیەوە سەرقاڵکردووە، ساڵی 2022 ئەستێرە فەرەنسییەکە گرێبەستەکەی نوێکردەوە و جارێکی دیکە یانەی شاهانەی بێهیواکردەوە، لە ماوەی رابردوودا هەواڵی ئەوە بڵاوبووەوە کە کیلیان بە پی ئێس جی راگەیاندووە کە لە کۆتایی ئەم وەرزەدا یانەکە بەجێدەهێڵێت و بەشێکی زۆری میدیاکان ناوی یاریزانەکە بە ریال مەدریدەوە دەبەستنەوە. 

 

بەپێی رۆژنامەی تایمزی بەریتانی، پاریس سانجێرمان لە ئێستاوە بەدوای شوێنگرەوەیەک بۆ ئێمباپێ دەگەڕێت و بۆ ئەو مەبەستە چاودێری تواناکانی مارکۆس راشفۆرد، یاریزانی ئینگلیزی و ئەستێرەی یانەی مانچێستەر یونایتد دەکات. 

 

رۆژنامەکە ئاماژەی بەوەشکردووە کە لویس کامپۆسی بەڕێوبەری وەرزشی یانە پاریسییەکە ماوەیەکی زۆرە بە راشفۆرد سەرسامە و دوو ساڵ لەمەوبەر گفتوگۆی لەگەڵ هێرشبەرە ئینگلیزییەکەدا کردووە بۆ ئەوەی پەیوەندی بە پاریس سانجێرمانەوە بکات، بەڵام نەبوونی بودجەی پێویست رێگریکرد لە گواستنەوەی یاریزانەکە بۆ پایتەختی فەرەنسا. لە ئەگەری رۆشتنی کیلیان، یانە پاریسیەکە بەشێکی خەرجییەکانی کەمدەبێتەوە و رەنگە ئەوکات لە رووی دارییەوە کێشەی نەمێنێت و بتوانێت راشفۆرد بگوازێتەوە پارک دێ پرانس. 

 

وەرزی رابردوو راشفۆرد ئاستێکی نایابی لەگەڵ مانچێستەر یونایتد پێشکێش کرد بەشێوەیەک کە لە 56 یاریدا بەشداری 41 گۆڵی کرد، دواتر لە هاوینی رابردوودا گرێبەستەکەی تاوەکو 2028 نوێکردەوە، بەڵام لەم وەرزەدا تاوەکو ئێستا ئامارەکانی روو لە خراپبوونە و تاوەکو ئێستا، لە 29 یاریدا بەشداری 11 گۆڵی کردووە.