‎چاوەڕوانییە جیهانییەكان لە تۆڕی میدیایی رووداو

‎شیوەن و لاواندنەوەكان، نزا و داواكارییەكان، نیگەرانی و هاوارەكان بە كوردی بوون; چیرۆكەكان بە كوردی دەگێڕدرانەوە. ئەوە دۆخی هاونیشتمانیانی حەوت پارێزگای باكووری كوردستان و هەرێمی عەفرینی رۆژئاوای كوردستان بوو دوای روودانی بوومەلەرزە كاولكەرەكەی رۆژی شەشی شوبات. تۆڕی میدیایی رووداو رووماڵی ئەو كارەساتەی بە زمانی رەسەنی خەڵكی ناوچەکە كرد، نەوەك زمانی وەرگێڕدراو و وەرگیراو. ئەوەی تۆڕی میدیایی رووداو كردی بۆ بینەر و بیسەر و خوێنەری خۆی بوو، بەڵام بووە سەرچاوەی سەرەكیی رووماڵی زیاتر لە 50 كەناڵ و دامەزراوەی كاریگەری میدیای جیهان تەنیا لە رێگەی کۆمەڵەی ئاڵوگۆڕی هەواڵی ئەوروپی ئینێكس. 

‎

 

‎رۆژانی 30 و 31ی ئادار كۆنفرانسی ئینێكس لە شاری سۆفیای پایتەختی بوولگاریا بەڕێوەچوو و شەش رۆژنامەڤانی تۆڕی میدیایی رووداو لە بەشە جیاوازەكان تێیدا بەشداربوون.

 

‎دووان لە سەرەكیترین ئەو بابەتانەی تاوتوێكران بریتیبوون لە هەبوونی پلانی رێكوپێك بۆ رووماڵی رووداو و پێشهاتە گەورەكان و خێرایی لە گواستنەوەدا. هاوبەشانی رووداو لە ئینێكس لەوانەش ژمارەیەك لە كەناڵەكانی رۆژهەڵاتی نێوەڕاست و ئەوروپا وەك نموونەی هەردوو خاڵ ئاماژەیان بە رووماڵی تۆڕی میدیایی رووداو لە بوومەلەرزەكەی باكووری كوردستان و توركیا كرد.

 

رووداو لە ساتی دوای بوومەلەرزەكەوە لە شەشی شوباتەوە بۆ ماوەی زیاتر لە 15 رۆژ لە شار و پارێزگاكانی ئامەد، مەرەش، سەمسوور و دیلۆكی باكووری كوردستان بەشێوەی لایڤ و لە رێگەی ڤیتی و بەرنامەی تایبەتی وەك رووداوی ئەمڕۆ و وێنەستۆرییەوە رووماڵی بوومەلەرزەكەی كرد. هاوبەشەكانمان لە ئینێكس ئاماژەیان بەوەكرد كە رووماڵەكەی رووداو وایكردووە رووبەڕووی كێشەی كەمی ماتریاڵ نەبنەوە لە گواستنەوەی دیمەنەكان بەشێوەی لایڤ و هەبوونی چیرۆكی دوای روودانی بوومەلەرزەكە.

 

‎ڤیتی و راپۆرتەكانی دیكەی رووداو لە شوێنەكانی دیكەش جێگەی سەرنجی هاوبەشانی رووداو بوون، وەك كارەكانی پەیامنێرمان دڵنیا رەحمان لەكاتی بۆردوومانی  شاری دیمیترۆ لە 14ی كانوونی دووەمی ئەمساڵ و راپۆرتی پەیامنێرانمان لە بەغدا و بەسرە و راپۆرتە ئامادەكراوەكانمان لە رۆژهەڵاتی كوردستان و رۆژئاوای كوردستان. ئەو كارانە چاوەڕوانیی زیاتری كەناڵ و دامەزراوە میدیاییە رۆژئاواییەكانی بۆ تۆڕی میدیایی رووداو بەدواوە دێت، بەتایبەتی لە 45 رۆژی داهاتوودا كاتێك هاونیشتمانیان و هاووڵاتیان لە باكووری كوردستان و توركیا دەچنە سەر سندووقەكانی دەنگدان بۆ هەڵبژاردنی پەرلەمانتار و سەرۆكی نوێی توركیا كە دەكرێت ئەنجامەكەی گۆڕانكاری گەورە بۆ توركیا، ناوچەكە و جیهانیش بهێنێت. هەربۆیە ئەو چاوەڕوانییەی بینەر و خوێنەری كورد لە رووداو هەیەتی بینەری دیكەش لە دەرەوە هەیەتی و ئێمەش دڵنیامان كردنەوە كە هەر ئێستاش بایەخ بەو مژارە دەدەین و دوای جەژنی رەمەزانیش دەست بە رووماڵی بەرفراوانی بانگەشەی هەڵبژاردن لە تورکیا دەكەین.

 

‎دیجیتاڵ میدیا و تۆڕە كۆمەڵایەتییەكان ‎بابەتێكی دیكەی سەرەکی بوون لە كۆنفرانسەكەدا کە گفتوگۆی زۆری لەسەرکرا، بەتایبەتی رۆڵی دیجیتاڵ میدیا لە رۆژنامەڤانیی ئێستادا. سەرقاڵبوونی هاووڵاتی بە كاری رۆژانەی و هۆشیاربوونی زیاتری تاك و ویستی بۆ وەرگرتنی زانیاریی زیاتر وایكردووە رۆژ دوای رۆژ بەكارهێنەرانی دیجیتاڵ میدیا زیاتربن. هەروەها بەكارهێنانی زۆر خێرای تۆڕە كۆمەڵایەتییەكان ‎بابەتێكی سەرەكی گفتوگۆ لەبارەكراوی كۆنفرانسەكە بوو. پسپۆڕانی بوارەكە جەختیان لەو خاڵە كردەوە كە دەبێ میدیا گەورەكان خۆیان لەگەڵ ئەم گۆڕانە خێرایە بەخێرایی و زیرەكی بگونجێنن و بتوانن لە رێگەی پلاتفۆرمەكانیانەوە بگەنە زۆرترین وەرگر.

 

‎هەربۆیە تۆڕی میدیایی رووداو چۆن چاوەڕوانییەكانی دەرەوە لێی جێبەجێ دەكات، رۆڵی خۆی وەك پێشەنگی میدیای كوردستانی و یەکێک لە پێشەنگانی ناوچەیی بۆ هاونیشتمانیانی کوردستان و وەرگرانی ناوچەیی و جیهانی رادەپەڕێنێت لە رێگەی پێدانی زانیاری و هەواڵی خێرا و تێروتەسەل  و متمانەپێكراوەوە لە رێگەی دیجیتاڵ میدیا و تۆڕە كۆمەڵایەتییەكانەوە.

 

عەلی زەڵمی، بەڕێوەبەری بەشی ئینتەیکی تۆڕی میدیایی رووداو