موسەننا ئەمین، ئەندامی هاوپەیمانیی هیوای کوردستان بە تۆڕی میدیایی رووداوی راگەیاند: "لە کۆبوونەوەی ئەمڕۆی پەرلەمانی عێراقدا، دەنگدان لەسەر هەمواری یاسا کۆنەکەی دادگەی فیدراڵی بەڕێوەچوو؛ ئێمە بایکۆتی کۆبوونەوەکەمان کرد. لە کۆبوونەوەکەدا دەنگ لەسەر هەمواری ماددەی 3ی یاساکە درا، لەماددەی سێ کە هەموارکراوە دادوەری یەدەگ بۆ دادگای فیدراڵی زیادکراوە."

 

ئەندامانی دادگاکە لە 9 کەس پێکدێن و دادوەرێکی یەدەگ زیادکراوە و لەکاتی ئامادەنەبوونی یەکێک لە ئەندامانی دادگەی فیدراڵی بەهەر هۆکارێک ئەو دادوەرە دەتوانێت ئامادەی کۆبوونەوەکە بێت؛ ئەو کاتە کۆبوونەوەی دادگەی فیدراڵی بەڕێوە دەچێت و بڕیاردەدات. باسیشی لەوەکرد،"لە ماددەیەکی دیکەی هەموارەکەدا دەستەواژەی ئەنجوومەنی دادوەریی هەرێمی کوردستان لادراوە و کراوەتە ئەنجوومەنی دادوەریی هەرێمەکان."

 

لەسەر رەشنووسی یاسای بودجەی 2021ی عێراقیش، موسەننا ئەمین گوتی: "لە هۆڵی دەستووریی پەرلەماندا محەممەد حەلبووسی، سەرۆکی پەرلەمان لەبارەی یاسای بودجە لەگەڵ فراکسیۆنەکانی پەرلەمان کۆدەبێتەوە، کە بڕیارە سبەی دەنگدان لەسەری بەڕێوەبچێت."

 

لە لێدوانێکی پێشتری بۆ تۆڕی میدیایی رووداو، موسەننا ئەمین، مەترسی خۆی لە زیادکردنی دادوەری یەدەگ نەشاردەوە و گوتی"داوامانکردووە دادوەری یەدەگ زیاد نەکرێت؛ نابێت ئەو دادوەرە لە شوێنی دادوەرێکی ئامادەنەبووی کورد لە کۆبوونەوەکە بتوانێت دەنگبدات، بەتایبەت لەوانەیە هەندێک پرسی هەستیاری نێوان هەولێر و بەغدا هەبێت." 

 

لەوبارەوە، ئەمڕۆ موسەننا ئەمین گوتی:"بەڵێ ئەو دادوەرە یەدەگەی زیادکراوە ئێستا دەتوانێت لەشوێنی کوردەکەش ئامادەی کۆبوونەوە بێت و دادگەکە بڕیار بدات".

بەبێ دەنگی پارتی و فراکسیۆنی هیوا و نوێنەرانی پێکهاتەکانی نێو پەرلەمانی عێراق، پەرلەمانی عێراق نەیتوانی دەنگ بە یاسای نوێی دادگەی فیدراڵی بدات و هەموارە کۆنەکەی پرۆژەیاسای دادگەی فیدراڵی بە دەنگی زۆرینەی لایەنە شیعییەکان، فراکسیۆنی یەکێتی و بەشێک لە سوننەکان پەسندکرا.

پەیامنێری رووداو دەڵێت، بەپێی ئەو هەموارەی پەسندکراوە ئەو دەسەڵاتە لە مەجلسی قەزای ھەرێمی کوردستان وەرگیرایەوە کە خۆی دوو ئەندامەکەی دیاری بکات.

پەیامنێری رووداو هەروەها گوتی: له‌ کۆبوونەوەکەی پەرلەمان و به‌ پشتبه‌ستن به‌ زۆرینه‌ی ساده‌ی (50+1) ده‌قی پرۆژه‌ی هه‌مواری یاسای ژماره‌ 30ی ساڵی 2005ی دادگای باڵای ئیتیحادی په‌سندکرا.

رووداو دیجیتاڵ

 

دانیشتنی پەرلەمانی عێراق بە ئامادەبوونی 188 پەرلەمانتار دەستیپێکرد و دواتر بۆ 205 پەرلەمانتار بەرزبوو. پێشتر باسی ئەوە کراوە کە بە دەنگی 160 پەرلەمانتار دەتوانرێت هەمواری یاساکە تێپەڕێندرێت. ئێستا لایەنە شیعەکان هەڕەشەی ئەوەیان کردووە کە ئەگەر لایەنە کوردستانییەکان بەشداریی لە کۆبوونەوەکە نەکەن هەمواری یاساکە تێدەپەڕێنن و هەرێمی کوردستانی تێدا دەردەکەن.