ئەمڕۆ یەکشەممە، ئەنجوومەنى هەواڵگریى نیشتمانیى عێراق بە سەرۆکایەتیى قاسم ئەعرەجى، راوێژکارى ئاسایشى نیشتمانی لەبارەى دۆخى سووریا کۆبووەوە.

 

بەگوێرەى راگەیێندراوی نووسینگەى رۆژنامەڤانیى قاسم ئەعرەجى، لەو کۆبوونەوەیەدا تاوتوێى پێشهات و گۆڕانکارییەکانى ئەم دواییەى سووریا و ئەو "هەڕەشانە" کراوە کە ئەگەر هەیە لێوەى دروست بێت و باسیشیان لەو رێوشوێنانە کردووە کە پێویستە بگیرێنەبەر بۆ پاراستنى "ئاسایشى نیشتمانیی عێراق".

 

لە 27ى تشرینى دووەمى 2024ـەوە دەستەی تەحریری شام و گرووپە چەکدارەکانی دیکەی هاوپەیمانی دەستیان بە هێرش بۆ سەر رۆژئاوای حەلەب کرد.

 

ئەنجوومەنى هەواڵگریى نیشتمانیى عێراق دەڵێت، چەند راسپاردەیەکیان لە بارەى ئەو دۆخە ئامادەکردووە و دەیانخەنە بەردەم فەرماندەى گشتیی هێزە چەکدارەکان.

 

ئەو ئەنجوومەنە دەڵێت، "ئەوەى لە سووریا دەگوزەرێت کارى تیرۆریستییە و عێراق پاڵپشتى گەلى سووریا و سوپاکەى بۆ رووبەڕووبوونەوەى تیرۆر دەکات".