سەرلەبەیانی ئەمڕۆ لە کۆنسوڵخانەی ئێران لە هەولێر رێوڕەسمی پرسە و ماتەمینی بۆ کوژرانی قاسم سولەیمانی، فەرماندەی سوپای قودسی سوپای پاسدارانی ئێران بەڕێوەچوو و شاندی حیزبە کوردستانییەکان بەشدارییان لە پرسەکەدا کرد.

 

 

لە لێدوانێکدا بۆ تۆڕی میدیایی رووداو، نەسروڵڵا رەشنوودی کۆنسوڵی کۆماری ئیسلامی ئێران لە هەولێر رایگەیاند: "بێگومان کۆماری ئیسلامی ئێران تۆڵەی خوێنی شەهید قاسم سولەیمانی و شەهیدەکانی دیکەی دەکەینەوە، ئەوەش داواکاری هەموو خەڵکی کۆماری ئیسلامی ئێرانە بۆ ئەوەی تۆڵەی خوێنی ئەو شەهیدانە بکەینەوە، بۆ ئەوەی ناوچەکە بە ئارامی بڕوات، کۆماری ئیسلامی ئێران هەمیشە بەدوای ئارامی ناوچەکەدا بووە، سەرجەم کۆششەکانی کۆماری ئیسلامی ئێران بۆ ئارامی ناوچەکە بووە، ئارامی عێراق و وڵاتانی دەوروبەر پەیوەندی بە ئاسایش و ئارامی کۆماری ئیسلامی ئێرانەوە هەیە، بۆیە کۆماری ئیسلامی ئێران بە هیچ شێوەیەک نایەوێت ناوچەکە بەرەو نائارامی بڕوات، بەڵام تۆڵە سەندنەوە لە خوێنی شەهید هەرچۆنێک بێت و هەر کاتێک پێویست بێت هەروەک بەرپرسانی کۆماری ئیسلامی ئێران ئاماژەیان پێداوە لە کات و شوێنی خۆیدا دەبێت و پشت بە خودا تۆڵە دەستێنینەوە".

 

کۆنسوڵی ئێران لەبارەی سەروەری خاکی عێراق دەڵێت: "خاکی عێراق هەمیشە جێی رێزی ئێمە بووە، ئێمە دراوسێیەکی کۆن و دێرینین، هەرگیز چاوی پاوانخوازمان بۆسەر خاکی عێراق نەبووە، هەرگیز کۆماری ئیسلامی ئێران سنووری عێراقی نەبەزاندووە، هیچ کات چاوی نەبڕیوەتە عێراق، ئەوەی ئێمە چاومان لێبووە هەمیشە، ئاسایش و ئەمنیەت و سەقامگیری عێراق بووە".

 

 

 

فازڵ میرانی سکرتێری مەکتەبی سیاسی پارتی دوای بەشداریکردن لە پرسەی قاسم سولەیمانی لە کۆنسوڵخانەی ئێران لە هەولێر بۆ میدیاکان رایگەیاند، هەوڵدەدەین کە عێراق نەبێتەوە مەیدانی شەڕ و ململانێ هەرێمی و جیهانییەکان، فازڵ میرانی دەڵێت، پێویستە عێراق خوێندنەوە بۆ دۆخی ئێستای خۆی بکات و هەوڵبدات بۆ ئاشتکردنەوەی شەقامی عێراقیی و بەدەم داواکاریی خۆپێشاندەرانەوە بچێت.

لەبارەی کەسایەتی قاسم سولەیمانیشەوە فازڵ میرانی گوتی: "ئێمە هاتووینەتە پرسەی پیاوێک و فەرماندەیەکی گەورەی سوپای پاسدارانی ئێران، کە دۆستی میللەتی عێراق و کوردیش بووە لە قۆناخە جیاجیاکاندا، رۆڵێکی زۆری هەبووە لە شەڕی عێراق و ئێران، رۆڵێکی زۆر باشیشی هەبووە لە یارمەتیدانی عێراق و کوردستان لە شەڕی دژ بە داعش. لە رێگەی کونسوڵخانەوە سەرەخۆشیمان ناردووە بۆ خانەوادەکەی، بەناوی سەرۆک بارزانی و سەرۆکایەتی هەرێم و سەرۆکایەتی حکومەت و مەکتەبی سیاسی و سەرکردایەتی پارتی".

 

 

 

سەرلەبەیانی ئەمڕۆ لەڕێگەی فڕۆکەخانەی ئەهوازەوە لە باشووری ئێران، تەرمی قاسم سولەیمانی و 4 ئەندامی دیکەی سوپای پاسداران کە لە بەرەبەیانی 3-1-2020 لە بەغدا کوژران گەیشتەوە ئێران.