سوپای ئیسرائیل ڤیدیۆیەکی بڵاوکردەوە گوایە دوایین ساتەکانی پێش کوژرانی یەحیا سنوار، سەرکردەی حەماس پێشاندەدات. 

ڤیدیۆکە لە رێگەی درۆنی بچووکەوە تۆمارکراوە. 

 

درۆنەکە لە پەنجەرەیەکی شاوەوە دەچێتە نێو نهۆمی دووەمی خانووێکی نیوە رووخاو کە پڕە لە داروپەردوو. 

 

لە ڤیدیۆیەکەدا دەردەکەوێت، کەسێک کە دەموچاوی بە جامانەیەک پێچاوە، لەسەر قەنەفەیەکی دانیشتووە و پشوو دەدات. 

کەسەکە دارێک هەڵدەگرێت و دەیگرێتە درۆنەکە. دواتر درۆنەکە دەکشێتە دواوە. 

 

ئەفیغای ئەدرەعی، گوتەبێژی سوپای ئیسرائیل لە پۆستێکی تۆڕی کۆمەڵایەتیی ئێکسدا هاوپێچ لەگەڵ ڤیدیۆکە نووسیویەتی، رۆژی چوارشەممە، لە ناوچەی تەلسوڵتان لە رەفەح، "هێزەکانمان سێ تێکدەریان بینی لە ماڵێکەوە هەڵدێن بۆ ماڵێکی دیکە بۆ ئەوەی رابکەن، بۆیە لێیان هاتنە دەست و هێرشیان کردە سەر. یەحیا سنوار بە تەنیا رایکرد بۆ نێو یەکێک لە خانووەکان. هێزەکانمان لە رێگەی درۆنەوە پشكنینیان بۆ ناوچەکە کرد."

 

ئەدرەعی هەروەها دەڵێت: "لە دوایین ساتەکانیدا، سنوار بە دەموچاو پێچراوی بینرا و دارێکی گرتە درۆنەکە. دوای ئەوەی کە زانرا وەک تێکدەرێک لە نێو خانووەکەیە، هێرشمانکردە سەر خانووەکە و کێوماڵمان کرد."

 

گوتەبێژەکەی سوپای ئیسرائیل هەروەها دەڵێت، سنوار هێلەکێکی گوللـەنەبڕ، دەمانچەیەک و 40 هەزار شیکلی پێبووە کە دەکاتە 10 هەزار و 700 دۆلار. 

 

هاوکات، لە وێنەکاندا تەسبیحێک، وێردی بەیانیان و ئێواران و کلاشینکۆفێک و چەند کەرەستەیەکی دیکەش دەردەکەون. 

 

شەوی پێنجشەممە، پۆلیسی ئیسرائیل رایگەیاند، تەرمی سنوار بۆ "پشکنینی زیاتر گوێزراوەتەوە ناوەندی نیشتمانیی دادپزیشکی." 

 

پێشتر سوپای ئیسرائیل رایگەیاندبوو کە لە رێگەی پشکنینی دی ئێن ئەیەوە، بۆیان دەرکەوتووە ئەوەی کوژراوە، سنوارە.

 

 

 

سەرۆکی ئەمریکا پێیوایە، ئیسرائیل مافی خۆی بووە سەرکردایەتی و ژێرخانی حەماس لەنێو ببات. دوای کوژرانی سنوار، بایدن گوتی: "حەماس چیدیکە توانای نییە هێرشێکی دیکەی هاوشێوەی 7ـی ئۆکتۆبەر دووبارە بکاتەوە."

 

شەوی پێنجشەممە، 17-10-2024، جۆ بایدن، سەرۆکی ئەمریکا لەبارەی کوژرانی یەحیا سنوار، سەرۆکی مەکتەبی سیاسیی حەماس رایگەیاند: "لەدوای کوژرانی یەحیا سنوار، رۆژێکی نوێ بۆ هەموو جیهان دەستپێدەکات. ئیسرائیل هەموو مافێکی هەبوو بۆ ئەوەی سەرکردایەتیی و ژێرخانی حەماس لەنێو ببات."

 

ئەمڕۆ سوپای ئیسرائیل کوژرانی یەحیا سنواری راگەیاند. بەگوێرەی سوپای ئیسرائیل، دوێنێ چوارشەممە چەند سەربازێکی ئیسرائیلی سێ چەکداریان بینیوە چوونەتە نێو باڵەخانەیەکی شاری رەفەح لە باشووری غەززە. ئەوانیش داوایان کردووە فڕۆکە ئەو باڵەخانەیە بۆردوومانبکات. دوای ئەوە سوپای ئیسرائیل رایگەیاند: "سێ تیرۆریستمان کوشت، گومان دەکەین یەکێکیان یەحیا سنوار بێت."

 

بایدن هەروەها رایگەیاند، بەمزووانە لەسەر پرسی بارمتەکان و کۆتاییهێنانی جەنگ قسە لەگەڵ نەتەنیاهوو دەکات. دوای کوژرانی سنوار، حەماس چیدیکە توانای نییە هێرشێکی دیکەی هاوشێوەی 7ـی ئۆکتۆبەر دووبارە بکاتەوە؛ "ئێستا دەرفەتێک بۆ غەززە هەیە بۆ ئەوەی داهاتوویەکی بەبێ دەسەڵاتی حەماسی هەبێت."

 

سەرۆکی ئەمریکا ئاماژەی بەوەدا، سنوار بەرپرسی کوشتنی هەزاران ئیسرائیلی، ئەمریکی، فەلەستینی و هاووڵاتییانی 30 وڵات بوو.

 

لەلایەکی دیکە، کامالا هاریس، جێگری سەرۆکی ئەمریکا و بەربژێری سەرۆکایەتی گوتی: "ئیسرائیل مافی بەرگری لەخۆکردنی هەیە، مەرجە هەموو بارمتەکان ئازاد بکرێن و کۆتایی بەو مەینەتییە بێت. جەنگی غەززە بووە هۆی ناسەقامگیریی زیاتری رۆژهەڵاتی نێوەڕاست. دوای کوژرانی سنوار، ئێستا دەرفەتێک هەیە بۆ ئەوەی جەنگ بوەستێت."

 

 

 

 

رۆژی پێنجشەممە، 17-10-2024، مایک جۆنسن، سەرۆکی ئەنجوومەنی نوێنەرانی ئەمریکا لە ئێکس بڵاویکردەوە: "دوای نەمانی سەرکردە تینوو بەخوێنەکانی حەماس و حیزبوڵڵا، کاتی ئەوەیە ئیدارەی بایدن-هاریس هاوشانی ئیسرائیل کاربکەن بۆ ئەوەی زۆرترین گوشار لە دژی سەری مارەکە، ئێران بکەن."

 

جۆنسن گوتیشی، دووبارە دادپەروەری لەلایەن ژن و پیاوە ئازاکانی سوپای ئیسرائیل بەدیهات؛ "یەحیا سنوار، ئەو کەسە شەڕەنگێز و قێزەونەی کە پلانی هێرشەکەی 7ـی ئۆکتۆبەری دانا، کوژرا."

 

جۆنسنی کۆماری گوتی: "هێشتا کوژرانی ئەو پیاوە کۆتایی جەنگی ئیسرائیل نییە. با ئەوە ببێتە هۆشدارییەک بۆ حەماس و هەموو ئەوانەی لە هێرشەکەی 7ـی ئۆکتۆبەر تێوەگلابوون، لەوانەیە ئێوە بتوانن تیرۆر و هەڕەشە بکەن، بەڵام ئەوانەی دەیانەوێت بە ئازادی بژین، هەرگیز خۆیان رادەست ناکەن."

 

ئەمڕۆ پێنجشەممە، سوپای ئیسرائیل کوژرانی یەحیا سنوار، سەرۆکی مەکتەبی سیاسیی حەماسی راگەیاند. سوپای ئیسرائیل گوتی، لە هێرشێکی دوێنێی سەر باڵەخانەیەکی شاری رەفەح لە غەززە، "سێ تیرۆریست" کوژران. سەرەتا سوپای ئیسرائیل گومانی لە پشتڕاستکردنەوەی تەرمی سنوار هەبوو، تاوەکو پشکنینی ددان و پەنجەمۆریان بۆ کرد و پشتڕاستیان کردەوە.

 

دوای کوژرانی سنوار، بنیامین نەتەنیاهوو، سەرۆکوەزیرانی ئیسرائیل رایگەیاند: "ئەمڕۆ سەلماندمان ئەوانەی شەڕمان لە دژ بکەن چییان بەسەر دێت، ئاڵنگارییەکانی بەردەممان زۆرن و شەڕ هێشتا کۆتایی پێنەهاتووە. حەماس چیدیکە ناتوانێت حوکمی غەززە بکات. ئێستا رۆژهەڵاتی نێوەڕاست دەرفەتی ئەوەی لە پێشە میحوەری خراپەکاری رابگرێت و روو لە ئاشتی و خۆشگوزەرانی بکات."

 

یەحیا سنوار لە ساڵی 1962 لە کەمپی خان یونس لەدایکبوو. خێزانەکەی لە شەڕی (عەرەب و ئیسرائیل)دا لە ساڵی 1948 لە ئەلمەجدال عەسقەلان دەرکراون یان ھەڵاتوون. یەکێک بوو لە ھاودامەزرێنەرانی دەزگای ئەمنیی حەماس. ساڵی 2011 ژیانی هاوژینی پێکهێنا و کوڕێکی هەیە بە ناوی ئیبراهیم.

 

خوێندنی سەرەتایی لە قوتابخانەکانی سەر بە دەزگای پەنابەرانی فەلەستین (UNRWA) تەواو کرد، بەکالۆریۆسی لە زمانی عەرەبی لە زانکۆی ئیسلامیی غەززە خوێند، ساڵی 2017 بە سەرۆکی حەماس لە کەرتی ‌‌غەززە دەستنیشانکرا، کە دەیکردە کەسی دووەم، واتە لە دوای ئیسماعیل هەنییە.

 

سنوار، چەند جارێک لەلایەن ئیسرائیلەوە دەستگیرکرا. لە ساڵی 1982 کاتێک تەمەنی 20 ساڵ بوو، بۆ یەکەم جار دەستگیر کرا. دوای شەش مانگ ئازاد کرا. لە ساڵی 1985 جارێکی دیکە دەستگیرکرا و ئەم جارە هەشت مانگ لە زیندان مایەوە. لە ساڵی 1988 جارێکی دەستگیرکرایەوە و بە 426 ساڵ زیندانیکردن سزادرا. لە 2011 لەگەڵ زیاتر لە هەزار کەسی دیکە لە رێککەوتنێکی تایبەتدا ئازادکرا.

 

 

 

بنیامین نەتەنیاهوو، سەرۆکوەزیرانی ئیسرائیل لەدوای کوژرانی یەحیا سنوار رایگەیاند: جەنگ کۆتایی نەهاتووە. 

 

نەتەنیاهوو دەڵێت: "تاوەکو هەموو بارمتەکان رزگار نەکرێن، جەنگی غەززە بەردەوام دەبێت." جەخت لەوەش دەکاتەوە کە "جارێکی دیکە حەماس حکومڕانیی غەززە ناکاتەوە." 

 

سوپای ئیسرائیل بەفەرمی کوژرانی یەحیا سنوار رادەگەیێنێت. هاوکات، ئیسرائیل کاتز، وەزیری دەرەوەی ئیسرائیل لە پەیامێکدا بۆ ژمارەیەک لە هاوکاتانی لەسەر ئاستی جیهان، کوژرانی یەحیا سنوار، سەرۆکی مەکتەبی سیاسی بزووتنەوەی حەماس پشتڕاست دەکاتەوە.

 

وەزیری بەرگریی بەریتانیا دەڵێت، بە کوژرانی یەحیا سنوار دڵگران نابێت، چونکە ئەو "سەرکردەیەکی تیرۆریست بووە و بەرپرسی هێرشەکەی حەماس بوو بۆ سەر ئیسرائیل."

 

رۆژی پێنجشەممە 17-10-2024 جۆن هیلی، وەزیری بەرگریی بەریتانیا لەبارەی ئەگەری کوژرانی یەحیا سنوار، سەرۆکی مەکتەبی سیاسیی حەماس گوتی "من بە کوژرانی سەرکردەیەکی تیرۆریستیی وەک سنوار دڵگران و خەمبار نابم، ئەو کەسێک بوو کە بەرپرسی هێرشە تیرۆریستییەکەی 7ـی ئۆکتۆبەر بوو."

 

سوپای ئیسرائیل رایگەیاند، لە هێرشێک بۆ سەر باڵەخانەیەکی شاری رەفەح لە غەززە، سێ چەکداریان کوشت. دواتر رایگەیاند گومان دەکرێت یەکێک لەوانەی کوژراوە یەحیا سنوار، سەرۆکی مەکتەب سیاسیی حەماس کوژرابێت.

 

هەرچەندە دەستەی پەخشی ئیسرائیل کوشتنی سنواری پشتڕاستکردەوە، بەڵام هێشتا بزووتنەوەی حەماس و سوپای ئیسرائیل هیچ لێدوانێکیان نییە.

 

هیلی گوتیشی: "هێرشەکەی 7ـی ئۆکتۆبەر بووە هۆی تاریکترین و کوشندەترین رۆژی گەلی جوو لەدوای جەنگی دووەمی جیهانییەوە؛ هەروەها بووە هۆی گرژی و تەنگژەی زیاتر لە ساڵێک و کوژرانی سڤیلێکی زۆری فەلەستین."

 

 

رۆژی پێنجشەممە 17-10-2024 ئەنتۆنیۆ تاجانی، وەزیری دەرەوەی ئیتاڵیا رایگەیاند، "پێدەچێت سەرکردەی سەربازیی حەماس کوژرابێت، پێموایە کە ئیسرائیل لە دژی حەماس بەرگریی لەخۆی کرد. هیوادارم نەمانی سەرکردەی حەماس ببێتە هۆی ئاگربەستی غەززە."

 

سوپای ئیسرائیل لە تۆڕی کۆمەڵایەتیی ئێکس رایگەیاند، لە ئۆپەراسیۆنێکی سەربازیی لە رەفەح لە باشووری غەززە "سێ تیرۆریستیان" کوشت. سوپای ئیسرائیل رایگەیاند، گومان دەکرێت یەکێک لەوانەی کوژراون یەحیا سنوار، سەرۆکی مەکتەبی سیاسیی حەماس بێت.

 

تاوەکو ئێستا حەماس و سوپای ئیسرائیل کوژرانی سنواریان پشتڕاست نەکردووەتەوە.

 

دەستەی پەخشی ئیسرائیل کوژرانی یەحیا سینوار، سەرۆکی مەکتەبی سیاسیی حەماسی پشتڕاستکردەوە و کەناڵ 12ی ئیسرائیل رایگەیاند، سینوار دوێنێ چوارشەممە، لە رەفەح کوژراوە. 

 

پۆلیسی ئیسرائیل رایگەیاند، پشکنینی ددان بۆ یەکێک لە تەرمەکان کراوە و دەرکەوتووە سینوارە.

 

دەستەی پەخشی ئیسرائیل کوژرانی یەحیا سنوار، سەرۆکی مەکتەبی سیاسیی حەماسی پشتڕاستکردەوە و کەناڵ 12ی ئیسرائیل دەڵێت، سنوار دوێنێ چوارشەممە، لە رەفەح کوژراوە. 

 

بە گوێرەی دەستەی پەخشی ئیسرائیل، سەرەتا سەربازانی ئیسرائیل ژمارەیەک چەکداریان بینیوە کە دەچنە نێو باڵەخانەیەک، دواتر داوای هێرشی ئاسمانییان کردووە بۆ سەر ئەو باڵەخانەیە. بەڵام نەیانزانیوە سنوار یەکێک بێت لەو چەکدارانە. 

 

دوای هێرشە ئاسمانییەکە، بەشێکی باڵەخانەکە داڕماوە، پاشان سەربازانی ئیسرائیل چوونەتە شوێنەکە و بینیویانە یەکێک لەو سێ کەسەی کە کوژراون، زۆر لە سنوار دەچێت. 

 

کەناڵ 12 ئاماژە بەوە دەکات، سوپا و شاباک سەرقاڵی پشکنینی دی ئێن ئەی ـین بۆ ئەوەی پشتڕاستبکرێتەوە کە ئەوە سنوارە یان نا، بەڵام تەرمەکەیان لەو شوێنە هێشتووەتەوە و نەیانتوانیوە لەگەڵ خۆیان بیبەن، چونکە ناوچەکە بۆمبڕێژکراوە. 

 

بە گوێرەی میدیاکە، سنوار هێلەکێکی سەربازیی لەبەردا بووە و ژمارەیەک نارنجۆکی پێبووە.

 

 

 

 

لە سەرەتای راگەیێندراوی سوپای ئیسرائیل کە تێیدا هاتبوو لە کوژرانی سینوار دەکۆڵنەوە، ژمارەیەک وێنە لەو شوێنەوە بڵاوکرانەوە کە ئۆپەراسیۆنەکەی تێدابوو. لە وێنەکاندا کەسێکی هاوشێوەی سینوار دەردەکەوێت. 

 

بەشێک لە سەرچاوەکان شیکارییان بۆ رووخساری سینوار و ددانەکانی کردووە، ئەنجامەکەی لێکچوونێکی زۆری تێدایە. بەڵام ئەوە بەس نییە بۆ بڕیاردان لەوەی کە ئەو کەسەی لە وێنەکاندا دەرکەوتووە سینوار یان نا. 

 

لە وێنەیەکی دیکەدا ژمارەیەک سەربازی ئیسرائیلی لەسەر تەرمەکە دەبیندرێن. ئێستا هەمووان چاوەڕوانی راگەیێندراوی فەرمیی حەماس و ئەنجامی پشکنینی دی ئێن ئەی ـین بۆ یەکلاییکردنەوەی کوژرانی سینوار. 

 

ئێستا کە میدیای فەرمیی ئیسرائیل کوژرانی یەحیا سینواری راگەیاندووە، بە کورتی بزانن سینوار کێیە و چ کارە بووە

 

- ناویە تەواوی یەحیا ئیبراهیم حەسەن سینوارە

 

- لە 29ی تشرینی یەکەمی 1962 لە شاری خان یونسی کەرتی غەززە لەدایکبووە، واتە تەمەنی 61 ساڵە. 

 

- لە دوای کوژرانی ئیسماعیل هەنییە، لە 6ی ئاب بە سەرۆکی مەکتەبی سیاسیی بزووتنەوەی حەماس دیاریکرا.

 

- لە 13ی شوباتی 2017ـەوە سەرکردەی حەماسە لە غەززە، واتە سەرکردەی لقی بزووتنەوەکەیە لە غەززە. 

 

- لە ساڵی 1988 بە تۆمەتی کوشتنی دوو سەربازی ئیسرائیلی و چوار سیخوڕی فەلەستینی، دەستگیرکرا. 

 

- لە ساڵی 1989 چوار جار سزای زیندانیی تاهەتایی بۆ دەرکرا. 

 

- لە ساڵی 2011 لە چوارچێوەی رێککەوتنی ئاڵۆگۆڕکردنی بەندکراواندا، سینوار ئازادکرا. 

 

- سینوار لە هەشتاکان لە زانکۆی ئیسلامیی غەززە بەکالۆریۆسی لە زمانی عەرەبیدا بەدەستهێنا

 

- لە ساڵی 2011 ژیانی هاوژینیی پێکهێناوە و باوکی سێ منداڵە

 

 

ئەندامانی کابینەی ئەمنیی ئیسرائیل ئاگادارکراونەتەوە کە وا دەردەکەوێت یەحیا سینوار، بەرپرسی مەکتەبی سیاسیی حەماس کوژرابێت. 

 

ئەو زانیارییە دوو بەرپرس بە رۆیتەرزیان گوتووە. کەناڵی 12ـی ئیسرائیلیش ئەوەی راگەیاندووە کە سینوار "کوژراوە."

 

تاوەکو ئێستا کوژرانەکە لەلایەن حەماسەوە پشتڕاست نەکراوەتەوە. بەرپرسێکی ئیسرائیل دەڵێت، پشکنینی دی ئێن ئەی دەکەن بۆ ئەوەی لە کوژرانی سینوار دڵنیاببنەوە. 

 

 

کەناڵ 12ـی ئیسرائیل بڵاویکردەوە، ئەو ئۆپەراسیۆنەی تێیدا "یەحیا سینوار کوژراوە" دوێنێ چوارشەممە بووە و سەربازەکانی ئیسرائیل تاوەکو ئەمڕۆ تەرمی سینواریان نەناسیوەتەوە.

دەستەی پەخشی ئیسرائیل رایدەگەیێنێت یەحیا سنوار، سەرۆکی مەکتەبی سیاسی حەماس و جێگرەوەی ئیسماعیل هەنییە لە رەفەح کوژراوە. 

 

هاوکات، چەند سەرچاوەیەکی ئەمنی لە ئیسرائیل بە ئاژانسی فرانس پرێسیان راگەیاندووە، لەدوای پشکنینی DNA دەرکەوتووە کە یەحیا سنوار کوژراوە. 

 

 

دوای هەفتەیەک لە کوژرانی ئیسماعیل هەنییە، سەرۆکی مەکتەبی سیاسیی حەماس، ئەو بزووتنەوە چەکدارە سەرۆکێکی نوێی هەڵبژارد. یەحیا سنوار، کە بە پیاوی تونێلەکان ناسراوە، بە شوێنگرەوەی هەنییە دانرا.

 

رۆژی سێشەممە، 06-08-2024، بزووتنەوەی حەماس رایگەیاند، یەحیا سنوار لە شوێنی ئیسماعیل هەنییە وەکو سەرۆکی مەکتەبی سیاسیی بزووتنەوەی حەماس دیاریکراوە.

 

یەحیا ئیبراهیم حەسەن سنوار، یەکێکە لە کەسایەتییە دیار و ناسراوەکانی بزووتنەوەی حەماس، پێشتر جێگری ئیسماعیل هەنییە بووە و تاوەکو ئێستاش لە کەرتی ‌غەززە ماوەتەوە.

 

 

یەحیا سنوار، یەکێکە لە سەرکردە سەربازییە تووندەکانی بزووتنەوەی حەماس، ئەو بە ئەندازیاری توونێلەکانی حەماس دادەنرێت و لەبەرئەوەش ناسناوی "پیاوی توونێلەکان"ی پێدراوە. هەروەها ئیسرائیل بەوە تۆمەتباری کردووە کە پلانداڕێژەری یەکەمی هێرشەکەی 7ی ئۆکتۆبەری دادەنێت کە تێیدا هەزار و 189 ئیسرائیلی کوژران و زیاتر لە 200یش بە بارمتە گیران.

 

سنوار، بە پیاوێکی تووند ناسراوە، تەنانەت لەگەڵ بەرپرسانی سەرووی خۆشییەوە تووند بووە و زۆر جار ملکەچی فەرمانەکان نەبووە، بۆیە بەشێکی ئیسرائیلییەکان بە سەرۆکی غەززە ناساندوویانە.

 

لەنێو داواکراوانی ئیسرائیل دا، یەحیا سنوار داواکراوە چ بە زیندوویی بێت یان بە مردوویی. 

 

"قەسابی خان یونس"

 

رۆژی 12-02-2024، ئیسرائیل ڤیدیۆی یەکێک لە توونێلەکانی حەماسی بڵاوکردەوە کە تێیدا ژن و منداڵیش دەردەکەون. لە ڤیدیۆکەدا پیاوێک دەردەکەوێت کە بە گوتەی ئەوان یەحیا سنوارە و مێژووی ڤیدیۆکە بۆ 10-10-2023 دەگەڕێتەوە.

 

بە گوتەی سوپای ئیسرائیل، ڤیدیۆکە تەنیا سێ رۆژ لەدوای هێرشی چەکدارانی حەماس بۆ سەر ناوچەکانی باشووری ئیسرائیل تۆمارکراوە.

 

هەمان رۆژ دانیاڵ هەگاری، گوتەبێژی سوپای ئیسرائیل رایگەیاند، "لە ئۆپەراسیۆنێکی سەربازیمان، ڤیدیۆیەکمان دۆزییەوە کە تێیدا بکوژ و سەرکردەی حەماس یەحیا سیوار پێشان دەدات لەگەڵ منداڵەکانی و یەکێک لە هاوژینەکانی هەڵدێت".

 

لە سەرەتای هێرشەکانی بۆ سەر غەززە، ئیسرائیل نەیشاردووەتەوە کە کوشتنی یان دەستگیرکردنی سنوار، یەکێکە لە ئامانجەکانیان. بنیامین نەتەنیاهوو، سەرۆکوەزیرانی ئیسرائیل سیوار بە "قەسابی خان یونس" ناو دەبات.

 

 

یەحیا سنوار، یەکێکە لە داواکراوەکان لەلایەن ویلایەتە یەکگرتووەکانی ئەمریکا. لە ساڵی 2015وە لە لیستی رەشی ئەو وڵاتەدا ناوی هەیە و بە "تیرۆریست" هەژمار کراوە.

 

شەوی رابردوو، 06-08-2024، ئەنتۆنی بلینکن، لە کۆنفرانسێکی رۆژنامەڤانیی هاوبەشدا لەگەڵ وەزیرانی دەرەوە و بەرگریی ئوسترالیا یەکەم لێدوانی لەبارەی سەرۆکە نوێیەکەی بزووتنەوەی حەماس دا.

 

بلینکن گوتی، بڕیار لای سنوارە ئەگەر بیەوێت ئاگربەستی غەززە سەربخات کە لە بەرژەوەندیی زۆرینەی فەڵەستینییەکانە و لە دۆخێکی سەختدان.

 

دادگەی نێودەوڵەتیی تاوان: سنوار و نەتەنیاهوو تاوانبارن

 

رۆژی 20-05-2024، داواکارێکی گشتی لە دادگەی نێودەڵەتیی تاوان رایگەیاند، "لەسەر بنەمایەکی بڕواپێکراو و ئەو بەڵگەنامانەی کۆکراونەتەوە و لەلایەن نووسینگەکەمەوە لێکۆڵینەوەیان تێدا کراوە؛ بنیامین نەتەنیاهوو، سەرۆکوەزیرانی ئیسرائیل و وەزیری بەرگری یۆئاڤ گاڵانت بەرپرسیارن لەو تاوانانەی لەنێو خاکی دەوڵەتی فەلەستین کراون".

 

کەریم خان گوتی، "سێ سەرکردەی باڵای حەماس؛ یەحیا سنوار، محەممەد زێف و ئیسماعیل هەنییە، بەرپرسن لەو تاوانانەی لەنێو خاکی ئیسرائیل دژی مرۆڤایەتی کرا، وەکو تاوانی جەنگیش هەژمار دەکرێت".

 

کەریم خان داوای کرد، بە تۆمەتی "برسیکردن، کوشتنی بە ئەنقەست و کۆمەڵکوژی" فەرمانی دەستگیرکردن بۆ ئەو بەرپرسە ئیسرائیلیانە دەربکرێت.

 

داواکاری گشتیی رایگەیاند، سەرکردەکانی حەماس تۆمەتبارن بە "کۆمەڵکوژی، کوشتن، بە بارمتەگرتن، دەستدرێژیی و تووندوتیژیی سێکسی، ئەشکەنجەدان، کاری نامرۆڤانە، مامەڵەی خراپ و شکاندنی شکۆ".

 

 

یەحیا سنوار چەند جارێک لەلایەن ئیسرائیلەوە دەستگیرکراوە. لە ساڵی 1982 کاتێک تەمەنی 20 ساڵ بوو، بۆ یەکەم جار دەستگیر کرا. دوای شەش مانگ ئازاد کرا. لە ساڵی 1985 جارێکی دیکە دەستگیرکرا و ئەم جارە هەشت مانگ لە زیندان مایەوە.

 

سنوار لە ساڵی 1988 جارێکی دەستگیرکرایەوە و بە 426 ساڵ زیندانیکردن سزادرا. لە 2011 لەگەڵ زیاتر لە هەزار کەسی دیکە، لە بەرامبەر ئازادکردنی سەربازێکی ئیسرائیلی، ئازاد کرا.

 

سنوار 23 ساڵی تەمەنی لە زیندانەکانی ئیسرائیل بەسەربردووە. لەنێو زیندان خۆی فێری زمانی عیبری کردووە. دوای ئازادکردنی لە زیندان، لە ساڵی 2012 بووە ئەندامی مەکتەبی سیاسیی بزووتنەوەی حەماس و بەرپرسیارێتیی باڵی سەربازیی کەتائیبی عیزەدین قەسامی پێدرا.

 

" کاتێک لە زیندان بوو، هەڕەشەی لە سەربازەکان دەکرد"

 

یەعقووب ئیمانوێل، پێشتر بەرپرسی ئەو زیندانە بووە کە سنواری تێدا بووە. لەبارەی هەڵسوکەوتی ئەو پیاوە قسەی بۆ رۆژنامەی "مەعاریف"ی ئیسرائیلی کردووە و دەڵێ: سنوار هەڕەشەی لە پاسەوانەکان دەکرد و دەیگوت "چاوەڕێبن، رۆژێک دادێ ئازاد بکرێم و لێپرسینەوە لەگەڵ هەمووتاندا بکەم".

 

بە گوتەی ئەو بەرپرسەی پێشووی زیندانی ئەمنی لە ئیسرائیل، قسەکانی سنوار "ترس و دڵەڕاوکێی لەنێو پاسەوانەکاندا دروست دەکرد".

 

 

یەحیا سنوار لە ساڵی 1962 لە کەمپی خان یونس لەدایکبووە. خێزانەکەی لە شەڕی (عەرەب و ئیسرائیل)دا لە ساڵی 1948 لە ئەلمەجدال عەسقەلان دەرکراون یان ھەڵاتوون. یەکێک بوو لە ھاودامەزرێنەرانی دەزگای ئەمنی حەماس. ساڵی 2011 ژیانی هاوژینی پێکهێناوە و کوڕێکی هەیە بە ناوی ئیبراهیم.

 

خوێندنی سەرەتایی لە قوتابخانەکانی سەر بە دەزگای پەنابەرانی فەلەستین (UNRWA) تەواو کرد، بەکالۆریۆسی لە زمانی عەرەبی لە زانکۆی ئیسلامیی غەززە خوێندووە، ساڵی 2017 بە سەرۆکی حەماس لە کەرتی ‌‌غەززە دەستنیشانکرا کە دەیکردە کەسی دووەم، واتە لە دوای ئیسماعیل هەنییە.

 

سنوار، چەند جارێک لەلایەن ئیسرائیلەوە دەستگیرکراوە. لە ساڵی 1982 کاتێک تەمەنی 20 ساڵ بوو، بۆ یەکەم جار دەستگیر کرا. دوای شەش مانگ ئازاد کرا. لە ساڵی 1985 جارێکی دیکە دەستگیرکرا و ئەم جارە هەشت مانگ لە زیندان مایەوە. لە ساڵی 1988 جارێکی دەستگیرکرایەوە و بە 426 ساڵ زیندانیکردن سزادرا. لە 2011 لەگەڵ زیاتر لە هەزار کەسی دیکە، لە بەرامبەر گیلعات شالیت، ئازاد کرا.

 

 

رادیۆی سوپای ئیسرائیل دەڵێت، تەلئەڤیڤ وڵاتانی ناوچەکەی لە کوژرانی یەحیا سینوار، سەرۆکی مەکتەبی حەماس و جێگرەوەی ئیسماعیل هەنییەی ئاگادار کردووەتەوە. 

 

تائێستا بزووتنەوەی حەماس و سوپای ئیسرائیل بەفەرمی کوژرانی سینواریان رانەگەیاندووە.

 

 

 

رۆژی پێنجشەممە 17-10-2024 سوپای ئیسرائیل راگەیێندراوێکی کورتی بڵاوکردەوە و گوتی: "لە ئۆپەراسیۆنێکی نێو کەرتی غەززە، سێ تیرۆریستمان کوشت. ئاژانسە بەرگرییەکانی ئیسرائیل خەریکی پشتڕاستکردنەوەی کوژرانی یەحیا سنوارن. لەم قۆناخەدا، ناسنامەی کوژراوەکان ئاشکرا ناکەین".

 

یەحیا سنوار پێشتر سەرۆکی باڵی سەربازیی حەماس ناسراو بە (کەتیبەکانی قەسام) بوو، دوای کوژرانی ئیسماعیل هەنییە، وەکو سەرۆکی مەکتەبی سیاسیی حەماس دەستنیشانکرا.

 

یەحیا سنوار، یەکێکە لە سەرکردە سەربازییە تووندەکانی بزووتنەوەی حەماس، ئەو بە ئەندازیاری توونێلەکانی حەماس دادەنرێت و لەبەرئەوەش ناسناوی "پیاوی توونێلەکان"ی پێدراوە. هەروەها ئیسرائیل بەوە تۆمەتباری کردووە کە پلانداڕێژەری یەکەمی هێرشەکەی 7ی ئۆکتۆبەری دادەنێت کە تێیدا هەزار و 189 ئیسرائیلی کوژران و زیاتر لە 200یش بە بارمتە گیران.

 

سنوار، بە پیاوێکی تووند ناسراوە، تەنانەت لەگەڵ بەرپرسانی سەرووی خۆشییەوە تووند بووە و زۆر جار ملکەچی فەرمانەکان نەبووە، بۆیە بەشێکی ئیسرائیلییەکان بە سەرۆکی غەززە ناساندوویانە.

 

رۆژی 12-02-2024، ئیسرائیل ڤیدیۆی یەکێک لە توونێلەکانی حەماسی بڵاوکردەوە کە تێیدا ژن و منداڵیش دەردەکەون. لە ڤیدیۆکەدا پیاوێک دەردەکەوێت کە بە گوتەی ئەوان یەحیا سنوارە و مێژووی ڤیدیۆکە بۆ 10-10-2023 دەگەڕێتەوە.

 

بە گوتەی سوپای ئیسرائیل، ڤیدیۆکە تەنیا سێ رۆژ لەدوای هێرشی چەکدارانی حەماس بۆ سەر ناوچەکانی باشووری ئیسرائیل تۆمارکراوە.

 

یەحیا سنوار لە ساڵی 1962 لە کەمپی خان یونس لەدایکبووە. خێزانەکەی لە شەڕی (عەرەب و ئیسرائیل)دا لە ساڵی 1948 لە ئەلمەجدال عەسقەلان دەرکراون یان ھەڵاتوون. یەکێک بوو لە ھاودامەزرێنەرانی دەزگای ئەمنی حەماس. ساڵی 2011 ژیانی هاوژینی پێکهێناوە و کوڕێکی هەیە بە ناوی ئیبراهیم.

 

خوێندنی سەرەتایی لە قوتابخانەکانی سەر بە دەزگای پەنابەرانی فەلەستین (UNRWA) تەواو کرد، بەکالۆریۆسی لە زمانی عەرەبی لە زانکۆی ئیسلامیی غەززە خوێندووە، ساڵی 2017 بە سەرۆکی حەماس لە کەرتی ‌‌غەززە دەستنیشانکرا کە دەیکردە کەسی دووەم، واتە لە دوای ئیسماعیل هەنییە.

 

سنوار، چەند جارێک لەلایەن ئیسرائیلەوە دەستگیرکراوە. لە ساڵی 1982 کاتێک تەمەنی 20 ساڵ بوو، بۆ یەکەم جار دەستگیر کرا. دوای شەش مانگ ئازاد کرا. لە ساڵی 1985 جارێکی دیکە دەستگیرکرا و ئەم جارە هەشت مانگ لە زیندان مایەوە. لە ساڵی 1988 جارێکی دەستگیرکرایەوە و بە 426 ساڵ زیندانیکردن سزادرا. لە 2011 لەگەڵ زیاتر لە هەزار کەسی دیکە، لە بەرامبەر گیلعات شالیت، ئازاد کرا.