دەزگای ئاسایشی هەرێمی کوردستان: ئەم ساڵ 636 تیرۆریست و 1019 بازرگان و بەکارهێنەرى مادەى هۆشبەر دەستگیر کراون

29-12-2024
هەستیار قادر
هەستیار قادر
 ئۆپەراسیۆنێکی دەزگای ئاسایشی هەرێمی کوردستان
ئۆپەراسیۆنێکی دەزگای ئاسایشی هەرێمی کوردستان
A+ A-

رووداو دیجیتاڵ

بەگوێرەى ئامارى دەزگای ئاسایشی هەرێمی کوردستان، لە ئەمساڵدا "636 تیرۆریست" و 1019 تۆمەتبار و بەکارهێنەرى مادەى هۆشبەر دەستگیر کراون. هەروەها دەستگیراوە بەسەر 14 هەزار و 16 ملیۆن دینارى ساختەدا.
 
ئەمڕۆ یەکشەممە، 29ـى کانوونى یەکەمى 2024، عەقید سەلام عەبدولخالق، بەرپرسی راگەیاندنی دەزگای ئاسایشی هەرێمی کوردستان ئامارى کار و چالاکیى سەرجەم بەڕێوەبەرایەتییەکانى سەر بەو دەزگایەى لە ساڵى 2024 بڵاوکردەوە. 
 
لە ئامارەکەدا هاتووە: "257 ئۆپەراسیۆن بۆ دەستگیرکردنى تیرۆریستان لەگەڵ 74 کێوماڵ ئەنجامدراون بۆ لەناوبردنى مۆڵگەى تیرۆریستان، لە ئەنجامى ئۆپراسیۆنەکاندا 636 تیرۆریست بە گوێرەى مادەکانى 2 و 4ـى یاسای بنبڕکردنى تیرۆر دەستگیرکراون و 126 کارى هاوبەش لەگەڵ هێزە ئەمنییەکانى هەرێمى کوردستان و عێراق ئەنجامدراوە".
 
مادەکانى 2 و 4ـى یاسای دژەتیرۆرى عێراق تایبەت بە تاوانەکانى تووندوتیژى، تێکدان، هەڕەشە و بەشدارى لە هێرشی تیرۆریستى، سزاکانیان لە نێوان بەندکردنى تاهەتایی بۆ لەسێدارەدانە.
  
عەقید سەلام عەبدولخالق گوتى: "1019 تۆمەتبارى بازرگانیکردن و بەکارهێنانى مادەى هۆشبەر دەستگیرکراون، دەستیش گیراوە بەسەر سێ تۆن و 24 کیلۆ و 600 گرام مادەى هۆشبەر بە هەموو جۆرەکانیەوە." 
 
بە گوێرەى ئامارەکە، سێ هەزار و 283 سکاڵا تۆمار کراون لەسەر تاوانى ئەلیکترۆنى. بەرپرسی راگەیاندنی دەزگای ئاسایشی هەرێمی کوردستان گوتى "بەشێکى زۆرى ئەو کەیسانە بە ئەنجام گەیشتوون رووبەڕووى یاسا کراونەتەوە."
 
ئەم ساڵ 10 هەزار و 157 سکاڵاى تایبەت بە تاوانە جۆراوجۆرەکان لە دەزگاى ئاسایشى هەرێمى کوردستان تۆمارکراون، 606 سکاڵا کە لەلایەن دادگەکانەوە ئاراستەى ئاسایش کراون، تایبەت بوون بە سیستمى کامێراکانى چاودێریى ئاسایش و هاوکاریى دادگەکان کراوە.
 
بەرپرسی راگەیاندنی دەزگای ئاسایشی هەرێمی کوردستان گوتى "50983 سەردانیکردن لەگەڵ لیژنە هاوبەشەکان ئەنجامدراوە و 629 تۆن و خۆراکى بەسەرچوو، دەرمانى پزیشکى و کشتوکاڵى بێ کوالێتى دەستیان بەسەردا گیراوە و لەنێوبراون". 
  
لە بەشێکى دیکەى ئامارەکەدا هاتووە "32 رووداوى خۆکوشتن و 63 رووداوى کوشتن و 171 رووداوى تەقەکردن تۆمار کراون، 142 تۆمەتبار و بازرگانى چەکى بێ مۆڵەت دەستگیرکراون، 881 پارچە چەک و 22354 پارچەى تەقەمەنى دەستیان بەسەردا گیراوە".
 
عەقید سەلام عەبدولخالق رایگەیاند: دەست گیراوە بەسەر 14 هەزار دۆلار و 16 ملیۆن و 750 هەزار دینار کە ساختە بوون.

 

کۆمێنتەکان

وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه‌

کۆمێنتێک دابنێ

داواکراوە
داواکراوە
 

دوایین هەواڵەکان

  ئەبوبەکر بایز، قایمقامی قەزای پشدەر.

قایمقامی پشدەر: هەرێمی کوردستان کەوتووەتە سەر هێڵی ترانزێتی مادەی هۆشبەر

قایمقامی قەزای پشدەر دەڵێت، بەهۆی بۆشایی خاڵە سنوورییەکان، بازرگانانی مادەی هۆشبەر بە ئاسانی هاتووچۆی هەرێمی کوردستان دەکەن؛ گوتیشی، ''پێچەوانەی بۆچوونی باو، ناوەندی شارە گەورەکان شوێنی بازرگانیکردن بە مادەی هۆشبەرە و ئالوودەبووانە، نەک ناوچە سنوورییەکان.''