دیمەنی ئاگرەکەی دارستانی قەڵادزێ
رووداو دیجیتاڵ
دوای نیوەڕۆی ئەمڕۆ ئاگر لە دارستانی قەڵادزی کەوتەوە، گوتەبێژی بەرگریی شارستانیی شارەکەش دەڵێت: "تیمەکانیان سەرقاڵی کۆنترۆڵکردنی ئاگرەکەن و هۆکارەکەشی دیار نییە."
رۆژی دووشەممە، 29-07-2024، عەلی قادر، گوتەبێژی بەرگریی شارستانیی قەڵادزێ بە رووداوی گوت: "لەنزیکی کاژێر 12ـەوە ئاگرەکە کەوتووەتەوە، لە نزیکەی 10 شوێنی جیاوازەوە ئاگرەکە بڵاوبووەتەوە و کۆنترۆڵکردنی زەحمەتە چونکە بایەکی بەهێز لە ناوچەکە هەیە."
بە گوتەی عەلی قادر، تیمەکان لە سەرجەم شوێنەکانەوە هاتوون، بۆ کۆنترۆڵکردنی ئاگرەکە و تاوەکو ئێستاش ئەو رووبەرەی سووتاوە دیارینەکراوە.
گوتەبێژی بەرگریی شارستانیی قەڵادزێ باسی لەوەشکرد، تیمێک بۆ لێکۆڵینەوە لە هۆکاری ئاگرەکە پێکهێنراوە.
"یەکێک لە هۆکارەکانی ئاگرەکان جگەرە و کەمتەرخەمیی هاووڵاتییانە." عەلی قادر، گوتەبێژی بەرگریی شارستانیی قەڵادزێ وای گوت.
هاوکات، بەرەبەیانی ئەمڕۆ ئاگرێکی گەورە لە شاخی گۆیژە کەوتەوە و بەپێی خەمڵاندنە سەرەتاییەکان زیاتر لە 200 دۆنم سووتاوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ